Fakahā kia Sioné

Ko e tohi fakaʻosi ia ʻi he Fuakava Foʻoú, pea ʻoku ʻi ai ha fakahā naʻe fai kia Sione ko e ʻAposetoló. Naʻe fakangofua ia ke ne mamata ki he hisitōlia ʻo e māmaní, kae tautautefito ki he ngaahi ʻaho fakaʻosí (Fakahā 1:1–2; 1 Nīfai 14:18–27; T&F 77). ʻOku toe ui foki ʻa e Fakahā kia Sioné ko e ʻApokalipisi (Apocalypse).

Naʻe maʻu ʻe Sione ʻa e fakahā ko ʻení ʻi he ʻaho ʻo e ʻEikí ʻi he motu ko Pātimosí (Fakahā 1:9–10), ofi mai ki he matāfonua ʻo ʻĒsiá, pea ʻikai mamaʻo mei ʻEfesō. ʻOku ʻikai ʻiloʻi ʻa e ʻaho totonu naʻe maʻu ai ʻa e fakahaá.

ʻOku ʻi he 1 Nīfai 14:18–27 mo e T&F 77 (ʻEta 4:15–16) ʻa e ngaahi kī ki hono ʻiloʻi ʻo e tohí.

ʻOku hoko ʻa e vahe 1–3 ko ha talateu ia ki he tohí pea mo e tohi ki he ngaahi siasi ʻe fitu ʻi ʻĒsiá. Naʻe fai ʻe Sione ʻa e ngaahi tohí ke tokoni ki he Kāingalotú ʻi heʻenau fakaleleiʻi ha ngaahi palōpalema. ʻOku lekooti ʻi he vahe 4–5 ha ngaahi meʻa-hā-mai naʻe maʻu ʻe Sione ʻa ia naʻe fakahā mai ai ʻa e māfimafi fakaʻeiʻeiki mo māʻoniʻoni ʻo e ʻOtuá mo Kalaisí. Naʻe lekooti ʻe Sione ʻi he vahe 6–9, 11 ʻa ʻene mamata ki ha tohi kuo fakamaʻu ʻaki ha meʻa fakamaʻu ʻe fitu, pea fakafofongaʻi ʻe he meʻa fakamaʻu taki taha ha taʻu ʻe taha afe ʻo e hisitōlia fakatuʻasino ʻo e māmaní. ʻOku fakamatala ʻa e ngaahi vahe ko ʻení ki he ngaahi meʻa ʻoku kau ki he meʻa fakamaʻu hono fitú (vakai ki he Fakahā 8–9; 11:1–15). ʻOku hanga ʻe he vahe 10 ʻo fakamatalaʻi ha tohi naʻe kai ʻe Sione. ʻOku hanga ʻe he tohí ʻo fakafofongaʻi ha ngāue ʻa ia te ne fakahoko ʻi he kahaʻú. ʻOku lekooti ʻi he vahe 12 ha meʻa-hā-mai ki he kovi ko ia naʻe kamata ʻi he langí ʻi he taimi naʻe angatuʻu ai ʻa Sētane pea kapusi ia ki tuʻá. Ko e tau ko ia naʻe kamata ʻi aí ʻoku kei hokohoko atu ia ʻi he māmaní. Naʻe hanga ʻe Sione ʻo fakamatalaʻi ʻi he vahe 13, 17–19 ʻa e ngaahi puleʻanga fakamāmani fakalielia ko ia ʻoku puleʻi ʻe Sētané, peá ne tohi foki ai mo honau ikuʻangá, kau ai hono fakaʻauha fakaʻosi ʻo e koví. ʻOku hanga ʻe he vahe 14–16 ʻo fakamatalaʻi ʻa e māʻoniʻoni ʻa e kau Māʻoniʻoní ʻi he lotolotonga ʻo e koví ki muʻa ʻi he hāʻele ʻanga ua mai ʻa Kalaisí. ʻOku hanga ʻe he vahe 20–22 ʻo fakamatalaʻi ʻa e Nofo Tuʻí, mo hono fakaʻofoʻofa ʻo e kolo ko Selūsalema Foʻoú, pea mo e ngaahi meʻa fakaʻosi ʻe hoko ʻi he hisitōlia ʻo e māmaní.