Ngaahi Tokoni Ako
Molonai, Foha ʻo Molomoná


Molonai, Foha ʻo Molomoná

Ko e palōfita Nīfai fakamuimui taha ia ʻi he Tohi ʻa Molomoná (taʻu T.S. 421). Naʻe foaki ʻe Molomona ki muʻa peá ne pekiá ʻa e ngaahi lekooti fakahisitōlia ko ia naʻe ui ko e ngaahi peleti ʻa Molomoná ki hono foha ko Molonaí (Ng. Lea ʻa M. 1:1). Naʻe fakaʻosi ʻe Molonai hono fakatahatahaʻi ʻo e ngaahi peleti ʻa Molomoná. Naʻá ne tānaki mai ʻa e vahe 8 mo e 9 ki he tohi ʻa Molomoná (Molom. 8:1). Naʻá ne hanga ʻo fakanounouʻi mo fakakau ki ai ʻa e tohi ʻa ʻEtá (ʻEta 1:1–2) pea tānaki mai ki ai mo ʻene tohi pē ʻaʻana ʻa ia ʻoku ui ko e tohi ʻa Molonaí (Molonai 1:1–4). Naʻe hanga ʻe Molonai ʻo fakamaʻu ʻa e ngaahi peletí pea fufuuʻi ia ʻi he moʻunga ko Komolá (Molom. 8:14; Molonai 10:2). Naʻe fekauʻi mai ʻa Molonai ʻi he 1823 ʻi he sino toe tuʻú ke fakahā mai ʻa e Tohi ʻa Molomoná kia Siosefa Sāmita (SS—H 1:30–42, 45; T&F 27:5). Naʻá ne fakahinohinoʻi ʻa e talavou palōfitá ʻi he taʻu taki taha mei he 1823 ki he 1827 (SS—H 1:54) pea faifai peá ne toki foaki mai ʻa e ngaahi peletí kiate ia ʻi he 1827 (SS—H 1:59). Naʻe hanga ʻe Siosefa Sāmita ʻo fakafoki ʻa e ngaahi peletí kia Molonai ʻi he ʻosi hono liliú.

Ko e tohi ʻa Molonaí

Ko e tohi fakaʻosi ia ʻi he Tohi ʻa Molomoná. Naʻe tohi ia ʻe he palōfita Nīfai fakamuimui taha ko Molonaí. ʻOku fakamatala ʻa e vahe 1–3 ki hono fakaʻauha fakaʻosi ʻo e kau Nīfaí, pea fai mai mo e fakahinohino ʻo kau ki hono foaki ʻo e Laumālie Māʻoniʻoní pea mo e lakanga fakataulaʻeikí. ʻOku fakamatala fakaʻāuliliki ʻa e vahe 4–5 ki hono anga totonu ʻo hono tāpuakiʻi mo tufaki ʻo e sākalamēnití. ʻOku hanga ʻe he vahe 6 ʻo fakamatalaʻi fakanounou ʻa e ngāue ʻa e Siasí. Ko e vahe 7–8 ko ha malanga ia ʻo kau ki he ngaahi ʻuluaki tefitoʻi moʻoni ʻo e ongoongoleleí, kau ai ʻa e ngaahi akonaki naʻe fai ʻe Molomona ʻo kau ki he tuí, ʻamanaki leleí, mo e manavaʻofá pea mo e founga ke lava ai ʻo ʻiloʻi ʻa e leleí mei he koví (Molonai 7), mo e fakamatala ʻa Molomona ʻoku moʻui ʻa e fānau īkí ʻia Kalaisi pea ʻoku ʻikai fie maʻu ke papitaiso kinautolu (Molonai 8). ʻOku fakamatalaʻi ʻe he vahe 9 ʻa e fai angahala lahi ʻaupito ʻa e puleʻanga ʻo e kau Nīfaí. Ko e vahe 10, ko e pōpoaki fakaʻosi ia ʻa Molonai pea ʻoku kau ai ʻa e founga ke ʻiloʻi hono moʻoni ʻo e Tohi ʻa Molomoná (Molonai 10:3–5).