Maama ʻo Kalaisí

Ko e ivi, mālohi, pe ko e tataki ia ʻoku haʻu mei he ʻOtuá ʻo fou mai ʻia Kalaisi pea ʻokú ne foaki moʻui mo e maama ki he ngaahi meʻa kotoa pē. Ko e fono ia ʻoku puleʻi ʻaki ʻa e ngaahi meʻa kotoa pē ʻi he langí mo e māmaní (T&F 88:6–13). ʻOkú ne toe tokoniʻi foki ʻa e kakaí ke mahino kiate kinautolu ʻa e ngaahi moʻoni ʻo e ongoongoleleí pea tokoni ki hono fokotuʻu ʻa kinautolu ʻi he hala ʻo e ongoongoleleí ʻa ia ʻoku fakatau atu ki he fakamoʻuí (Sione 3:19–21; 12:46; ʻAlamā 26:15; 32:35; T&F 93:28–29, 31–32, 40, 42).

ʻOku totonu ke ʻoua naʻa fetoʻoaki ʻa e maama ʻo Kalaisí mo e Laumālie Māʻoniʻoní. ʻOku ʻikai ko ha tokotaha ʻa e maama ia ʻo Kalaisí. Ko ha mālohi pē ia ʻoku haʻu mei he ʻOtuá pea ʻokú ne teuteuʻi ha taha ke ne maʻu ʻa e Laumālie Māʻoniʻoní. Ko ha mālohi ia ke ne tākiekina ʻa e moʻui ʻa e kakai kotoa pē ki he leleí (Sione 1:9; T&F 84:46–47).

Ko e meʻa ʻe taha ʻoku hā ai ʻa e maama ʻo Kalaisí ko e konisēnisí, ʻa ia ʻokú ne tokoniʻi ha taha ke ne fili ki he meʻa ʻoku totonú pe ki he meʻa ʻoku halá (Molonai 7:16). Ko e taimi ko ia ʻoku ʻilo lahi ange ai ʻa e kakaí ki he ongoongoleleí, ʻoku ongongofua lahi ange ai honau konisēnisí (Molonai 7:12–19). Ko e kakai ko ia ʻoku nau talangofua ki he maama ʻo Kalaisí ʻoku tākiekina mai ʻa kinautolu ki he ongoongolelei ʻa Sīsū Kalaisí (T&F 84:46–48).