Nofo Tuʻí Vakai foki ki he Hāʻele ʻAnga Ua Mai ʻa Sīsū Kalaisí; Heli Ko e vahaʻataimi ia ʻo e taʻu ʻe taha afe ʻo e melino ʻa ia ʻe kamata ʻi he hāʻele mai ʻa Kalaisi ke nofo tuʻi tonu ʻi he māmaní (TT 1:10). ʻE ʻikai toe hiki hake ʻe ha puleʻanga ʻa e heletā, pe te nau ako ki he tau, ʻĪsaia 2:4 (2 Nīfai 12:4; Maika 4:3). Ko e ngoue kuo liʻakí kuo hangē ʻeni ko ʻĪtení, ʻIsikeli 36:35. Pea naʻa nau moʻui mo pule mo Kalaisi ʻi he taʻu ʻe taha afe, Fakahā 20:4. Koeʻuhi ko e māʻoniʻoni ʻe ʻikai maʻu ʻe Sētane ha mālohi, 1 Nīfai 22:26. Te u nofo ʻi he māʻoniʻoni ʻi he māmaní ʻi ha taʻu ʻe taha afe, T&F 29:11. ʻO ka ʻosi ʻa e taʻu ʻe taha afé te u toki fakatolonga leva ʻa e māmaní ʻi ha kiʻi vahaʻataimi siʻi, T&F 29:22. ʻE hokosia ʻa e fuʻu Afeʻi Taʻu, T&F 43:30. ʻE tupu hake ʻa e fānau ʻa e kau māʻoniʻoní taʻe ʻi ai ha angahala, T&F 45:58. ʻE tupu hake ʻa e fānaú kae ʻoua ke nau hoko ʻo motuʻa; pea ʻe liliu ʻa e tangatá ʻi he kemo ʻo e mata, T&F 63:51. ʻI he kamataʻanga ʻo hono fitu ʻo e taʻu ʻe afé ʻe fakatapui ʻe he ʻEiki ko e ʻOtuá ʻa e māmaní, T&F 77:12. ʻE ʻikai te nau toe moʻui kae ʻoua ke ʻosi ʻa e taʻu ʻe afé, T&F 88:101. ʻE haʻi ʻa Sētane ʻo feʻunga mo e taʻu ʻe taha afe, T&F 88:110. Ko hono fakamatalaʻi ʻo e Nofo Tuʻí, T&F 101:23–34. ʻE mālōlō ʻa e māmaní ʻo feʻunga mo ha taʻu ʻe taha afe, Mōsese 7:64.