ʻIfalemi
Ko e foha ia hono ua ʻo Siosefa mo ʻAsinaté, ʻi he Fuakava Motuʻá (Sēnesi 41:50–52; 46:20). Naʻe maʻu ʻe ʻIfalemi ʻa e tāpuaki ʻo e ʻuluaki fānaú ʻo ʻikai hangē ko e ʻulungāanga tukufakaholó, pea ʻikai maʻu ia ʻe Manase, ʻa ia ko e foha lahí (Sēnesi 48:17–20). Naʻe hoko ʻa ʻIfalemi ko e tamai ʻa e faʻahinga ʻo ʻIfalemí.
Ko e faʻahinga ʻo ʻIfalemí
Naʻe foaki kia ʻIfalemi ʻa e tāpuaki ʻo e ʻuluaki fānau ʻi ʻIsilelí (1 Fkmtl. 5:1–2; Selem. 31:9). ʻE hoko ko honau faingamālie mo e fatongia ʻi he ngaahi ʻaho fakaʻosí ke maʻu ʻa e lakanga fakataulaʻeikí, pea ʻave ʻa e pōpoaki ʻo e ongoongolelei kuo toe fakafoki maí ki he māmaní, pea hiki hake ha fuka ke tānaki mai ʻa ʻIsileli kuo fakamoveteveteʻí (ʻĪsaia 11:12–13; 2 Nīfai 21:12–13). ʻE fakakalauni ʻe he fānau ʻa ʻIfalemí ʻaki ʻa e nāunau ʻa kinautolu ʻe haʻu mei he ngaahi fonua ʻo e tokelaú ʻa ia te nau foki mai ʻi he ngaahi ʻaho fakaʻosí (T&F 133:26–34).
Ko e vaʻakau ʻo ʻIfalemí pe Siosefá
Ko ha lekooti ʻo ha kulupu ʻe taha mei he faʻahinga ʻo ʻIfalemí ʻa ia naʻe taki atu ʻa kinautolu mei Selūsalema ki ʻAmelika ʻi he taʻu 600 K.M. nai. ʻOku ui ʻa e lekooti ʻo e kulupu ko ʻení ko e vaʻakau ʻa ʻIfalemí pe Siosefá pe ko e Tohi ʻa Molomoná. Te ne fakataha mo e vaʻakau ʻo Siutá (ʻa ia ko e Tohi Tapú) ʻo hoko ko ha fakamoʻoni pē ʻe taha ki he ʻEiki ko Sīsū Kalaisí, mo ʻene toetuʻú, mo ʻene ngāue faka-ʻOtua ʻi he lotolotonga ʻo e ongo vaʻa ko ʻeni ʻo e fale ʻo ʻIsilelí.