Mataʻitofe Mahuʻingá

ʻOku fakatatau ʻa e puleʻanga ʻo e ʻOtuá ʻi he māmaní ki ha “mataʻi tofe mahuʻinga lahi” (Mātiu 13:45–46).

Ko e Mataʻitofe Mahuʻingá ko e hingoa foki ia kuo ui ʻaki ha taha ʻo e ngaahi tohi folofola ʻe fā ʻoku ui ko e “ngaahi tohi folofola” ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe pulusi ʻa e ʻuluaki pulusi ʻo e Mataʻitofe Mahuʻingá ʻi he 1851 pea naʻe kau ai ha niʻihi ʻo e ngaahi meʻa kuo kau ia he taimí ni ʻi he Tokāteline mo e Ngaahi Fuakavá. ʻOku kau ʻi hono ngaahi pulusi talu mei he 1902 ʻa e (1) ngaahi konga naʻe toʻo mei hono liliu ʻe Siosefa Sāmita ʻa e tohi Sēnesí, ʻa ia ʻoku ui ko e tohi ʻa Mōsesé, pea mo e Mātiu vahe 24, ʻa ia ʻoku ui ko e Siosefa Sāmita—Mātiú; (2) Ko e liliu ʻa Siosefa Sāmita ʻo e ngaahi takainga pepa kiliʻi kaho faka-ʻIsipite ʻa ia naʻá ne maʻu ʻi he 1835, pea ʻoku ui ia ko e tohi ʻa ʻĒpalahamé; (3) ko ha konga mei he hisitōlia ʻo e Siasí naʻe fai ʻe Siosefa Sāmitá, ʻa ia naʻá ne hiki ia ʻi he 1838 pea ʻoku ui ia ko e Siosefa Sāmita—Hisitōliá; pea ko hono (4) ko e Ngaahi Tefito ʻo e Tuí, ʻa ia ko ha ngaahi fakamatala ia ʻe hongofulu mā tolu ʻo e tuí mo e tokāteliné.