Molomona, Ko e Palōfita Nīfaí
Ko ha palōfita Nīfai, ko e seniale fakakautau, mo e tokotaha tauhi lekooti ʻi he Tohi ʻa Molomoná. Naʻe moʻui ʻa Molomona ʻi he taʻu 311–385 T.S. nai (Molom. 1:2, 6; 6:5–6; 8:2–3). Ko ha taki fakakautau ia ʻi ha konga lahi ʻo ʻene moʻuí, ʻo kamata ʻi hono taʻu hongofulu mā nimá (Molom. 2:1–2; 3:8–12; 5:1; 8:2–3). Naʻe fakahinohinoʻi ʻe ʻEmaloni ʻa Molomona ke ne teuteuʻi ia ke tauhi ʻa e ngaahi lekōtí mo hiki ʻa e ngaahi lekōtí (Molom. 1:2–5; 2:17–18). Naʻe hili hono hiki ʻe Molomona ʻa e hisitōlia ʻo hono taimí, naʻá ne hanga leva ʻo fakanounouʻi ʻa e ngaahi peleti lalahi ʻa Nīfaí ki he ngaahi peleti ʻa Molomoná. Naʻá ne toki tuku ki mui ʻa e lekooti toputapu ko iá ki hono foha ko Molonaí. Naʻe hoko ʻa e ngaahi peleti ko iá ko e konga ʻo e lekooti ʻa ia naʻe liliu mei ai ʻe Siosefa Sāmita ʻa e Tohi ʻa Molomoná.
Ko e Ngaahi Lea ʻa Molomoná
Ko ha tohi siʻisiʻi ʻi he Tohi ʻa Molomoná. Naʻe hanga ʻe Molomona, ʻa ia naʻá ne liliu fakaleleiʻi ʻa e ngaahi lekōtí kotoa ʻo fakahū ʻa e kiʻi fakamatala nounou ko ʻení ʻi he vahaʻa ʻo e ngaahi lea fakaʻosi ʻa ʻAmalekai ʻi he tohi ʻAmenaí mo e ngaahi ʻuluaki lea ʻi he tohi ʻa Mōsaiá. (Vakai ki he “Ko ha Fakamatala Nounou ʻo kau ki he Tohi ʻa Molomoná” ʻi he konga ki muʻa ʻo e Tohi ʻa Molomoná.)
Ko e tohi ʻa Molomoná
Ko ha tohi mavahe pē ia ʻi he tohi folofola ko ia ʻoku ui ko e Tohi ʻa Molomoná. ʻOku fakamatala ʻa e vahe 1–2 ʻo kau kia ʻEmaloni, ʻa ia ko ha palōfita ʻi he kau Nīfaí, mo ʻene fakahinohinoʻi ʻa Molomona ʻo kau ki he taimi mo e feituʻu te ne maʻu mei ai ʻa e ngaahi peletí. ʻOku kau foki ki he ngaahi tau lalahi naʻe hokó, pea mo hono ʻave ʻo e Toluʻi Nīfaí koeʻuhi ko e fai angahala ʻa e kakaí. ʻOku fakamatala ʻa e vahe 3–4 ki he kalanga ʻaki ʻe Molomona ʻa e fakatomalá ki he kakaí; ka naʻe ʻikai te nau fie fanongo kiate ia, pea naʻe lahi ange ʻa e fai angahalá ʻi ha toe taimi ʻi muʻa ʻi ʻIsileli. ʻOku tohi ʻi he vahe 5–6 ʻa e ngaahi tau fakaʻosi ʻi he vahaʻa ʻo e kau Nīfaí mo e kau Leimaná. Naʻe mate ʻa Molomona fakataha mo e tokolahi ʻo e puleʻanga ʻo e kau Nīfaí. ʻI he vahe 7, ki muʻa pea mate ʻa Molomoná naʻá ne ui ki he kakaí—ʻi he taimi ko iá pea ʻi he kahaʻú foki—ke nau fakatomala. ʻOku tohi ʻi he vahe 8–9 ʻa e toe toko taha pē ʻa e foha ʻo Molomona ko Molonaí. Naʻá ne hiki ʻa e ngaahi meʻa fakaʻosi naʻe hokó ʻi he maté mo e fakaʻauhá, kau ai ʻa e ngataʻanga ʻo e kakai Nīfaí peá ne tohi foki mo ha pōpoaki ki he ngaahi toʻu tangata mo e kakai ʻi he kahaʻú ʻa ia te nau lau ʻa e lekooti ní.