Taniela
Ko e tangata ia ʻoku kau lahi ki ai ʻa e tohi ʻa Taniela ʻi he Fuakava Motuʻá; pea ko ha palōfita ia ʻa e ʻOtuá pea ko ha tangata tui lahi foki.
ʻOku ʻikai ʻi ai ha fakamatala ʻo kau ki heʻene ongo mātuʻá, neongo naʻe hangē ko ʻene tupú mei ha fāmili fakatuʻi (Taniela 1:3). Naʻe ʻave pōpula ia ki Pāpilone ʻa ia naʻe fakahingoa ai ia ko Pelitisasa (Taniela 1:6–7). Naʻe fakafisi ʻa Taniela mo ha kau pōpula ʻe toko tolu kehe ke nau kai ʻa e meʻakai ʻa e tuʻí koeʻuhi ko ha ngaahi ʻuhinga fakalotu (Taniela 1:8–16).
Naʻe ʻofeina ʻa Taniela ʻe Nepukanesa mo Talaiasi tuʻunga ʻi hono mālohi ke ne fakaʻuhingaʻi ʻa e ngaahi misí (Taniela 2; 4). Naʻá ne toe lau mo fakaʻuhingaʻi foki ʻa e meʻa naʻe tohi ʻi he holisí (Taniela 5). Naʻe faʻufaʻu ʻe hono ngaahi filí ke fakahoko ha kovi kiate ia, pea naʻe lī ai ia ki ha ʻana ʻo e fanga laioné, ka naʻe fakahaofi ʻe he ʻEikí ʻa ʻene moʻuí (Taniela 6).
Ko e tohi ʻa Tanielá
ʻOku konga ua ʻa e tohí: ko e vahe 1–6 ko e ngaahi talanoa ia ʻoku kau kia Taniela mo hono ngaahi kaungāmeʻa ʻe toko tolú. ʻOku kau ʻa e vahe 7–12 ki he ngaahi meʻa-hā-mai fakakikite naʻe mamata ki ai ʻa Taniela. ʻOku hanga ʻe he tohí ʻo akoʻi hono mahuʻinga ʻo e tauhi pau ki he ʻOtuá pea fakatātaaʻi mai ai hono tāpuakiʻi ʻe he ʻEikí ʻa e kakai ʻoku tui faivelengá.
Ko ha tokoni mahuʻinga ʻa e tohí ko hono fakaʻuhingaʻi ʻo e misi ʻa e tuʻi ko Nepukanesá. Naʻe kau ʻi he misí ʻa hono kikiteʻi ʻo e puleʻanga ʻo e ʻOtuá ʻi he ngaahi ʻaho fakaʻosí, ko ha maka naʻe tā mei he moʻungá. E teka atu ʻa e maká kae ʻoua kuó ne fakafonu ʻa e māmaní kotoa (Taniela 2; vakai foki ki he T&F 65:2).