Maʻake
Ko Sione Maʻaké ko e tama ia ʻa Mele ʻa ia naʻe nofo ʻi Selūsalema ʻi he Fuakava Foʻoú (Ngāue 12:12), pea mahalo ʻoku tokoua ʻaki ia (pe ʻilamutu) ʻo Panepasa (Kolose 4:10). Naʻá ne ʻalu mo Paula mo Panepasa mei Selūsalema ʻi heʻenau ʻuluaki fononga fakafaifekaú, peá ne mavahe meiate kinaua ʻi Peaka (Ngāue 12:25; 13:5, 13). Naʻá ne toki fononga fakataha ki mui mo Panepasa ki Saipalo (Ngāue 15:37–39). Naʻá ne ʻia Paula ʻi Loma (Kolose 4:10; Filim. 1:24); pea naʻá ne ʻia Pita ʻi Pāpilone (mahalo pē ʻi Loma) (1 Pita 5:13). Naʻe fakamuimui leva ʻa ʻene ʻia Tīmote ʻi ʻEfesō (2 Tīm. 4:11).
Ko e Kōsipeli ʻa Maʻaké
Ko e tohi ia hono ua ʻi he Fuakava Foʻoú. Mahalo naʻe tohi ʻa e kōsipeli ʻa Maʻaké ʻo fakatatau ki he fakahinohino ʻa Pita. Ko ʻene taumuʻá ke fakamatalaʻi ko e ʻEikí ko e ʻAlo ia ʻo e ʻOtuá pea naʻá ne moʻui mo ngāue ʻi he lotolotonga ʻo e kakaí. Naʻe hanga ʻe Maʻake ʻo fakamatalaʻi ʻi he mālohi mo e loto-fakatōkilalo, ʻa e faʻahinga fakakaukau naʻe tōkaki ʻe Sīsū ʻi he loto ʻo e kakai naʻa nau fanongo kiate iá. ʻOku pehē ʻi he talatukufakaholó, naʻe hili pē ʻa e pekia ʻa Pitá, pea ʻalu leva ʻa Maʻake ʻo ʻaʻahi ki ʻIsipite, peá ne fokotuʻu ʻa e Siasí ʻi ʻAlekisanitulia, pea naʻá ne mate fakamaʻata.
Vakai ki he “Kōsipelí, Ngaahi” ke maʻu mei ai ha fakamatala fakanounou ki he ngaahi vahé.