Selemaia

ʻOku kau ʻi he vahe 1–6 ʻa e ngaahi kikite naʻe fai lolotonga ʻa e pule ʻa Sōsaiá. Ko e vahe 7–20 ko ha ngaahi kikite ia naʻe fai ʻi he taimi ʻo Sihoakimí. ʻOku fakamatala ʻa e vahe 21–38 ki he pule ʻa Setikiá. ʻOku ʻi he vahe 39–44 ʻa e ngaahi kikite pea ʻoku fakamatalaʻi ai ʻa e ngaahi meʻa fakahisitōlia naʻe hoko hili ʻa e tō ʻa Selūsalemá. ʻOku ʻi he vahe 45 ha talaʻofa kia Paluki, ʻa ia ko ʻene tangata tohí, ʻe fakatolonga ʻa e moʻui ʻa Palukí. Pea ʻoku tohi leva ʻi he vahe 46–51 ʻa e ngaahi kikite ʻo kau ki he ngaahi puleʻanga muli. Ko e vahe 52 ko ha fakamatala fakahisitōlia fakaʻosi ia. Naʻe kau ha niʻihi ʻo e ngaahi kikite ʻa Selemaiá ʻi he ngaahi peleti palasa ʻa Lēpani ʻa ia naʻe ʻomi ʻe Nīfaí (1 Nīfai 5:10–13). ʻOku tuʻo ua foki ha ʻasi ʻa e hingoa ʻo Selemaiá ʻi he Tohi ʻa Molomoná (1 Nīfai 7:14; Hilam. 8:20).

ʻOku toe kau foki ʻi he tohi ʻa Selemaiá ha fakamatala ki he moʻui ʻa e tangatá ʻi he maama fakalaumālié pea mo hono tomuʻa fakanofo ʻo Selemaiá (Selem. 1:4–5); mo ha kikite ki ha toe foki mai ʻa ʻIsileli mei honau fakamoveteveteʻí, ko e taki taha mei ha kolo mo e toko ua mei he faʻahinga [fāmili] ki Saione, ko ha fonua lelei ʻa ia ʻe lava ʻo nofo ai ʻa ʻIsileli mo Siuta ʻi he nonga mo e fiemālie (Selem. 3:12–19); pea mo ha kikite ki hono tānaki ʻe Sihova ʻa ʻIsileli mei he ngaahi fonua ʻi he tokelaú ʻi haʻane fekau atu ha “kau toutai” mo e “kau tuli manu” ke kumi ʻa kinautolu (Selem. 16:14–21). ʻE lahi ange ʻa e meʻa ko ʻeni ʻi he ngaahi ʻaho fakaʻosí, ʻi hono ʻomi ʻe Mōsese ʻa ʻIsileli ki tuʻa mei ʻIsipité (Selem. 16:13–15; 23:8).