Nōmipa

Ko e tohi ia hono fā ʻi he Fuakava Motuʻá. Naʻe tohi ʻe Mōsese ʻa e tohi Nōmipá. ʻOku hanga ʻe he tohi Nōmipá ʻo fakamatalaʻi ʻa e talanoa ki he fononga ʻa ʻIsileli mei he Moʻunga Sainai ki he ngaahi toafa tokalelei ʻo Mōapé ʻi he ngataʻanga fonua ʻo Kēnaní. Ko e taha ʻo e ngaahi lēsoni mahuʻinga ʻokú ne akoʻi maí, kuo pau ke ʻaʻeva ʻa e kakai ʻo e ʻOtuá ʻi he tui, ʻo falala ki heʻene ngaahi talaʻofá kapau ʻoku nau loto ke ola lelei ʻenau moʻuí. ʻOkú ne toe fakamatalaʻi mai ʻa e ngaahi tautea ʻo ʻIsileli mei he ʻOtuá koeʻuhi ko e talangataʻá pea fai mai mo e ngaahi fakamatala ʻo kau ki he ngaahi lao ʻa ʻIsilelí. ʻOku maʻu ʻa e hingoa ʻo e tohí mei hono mahuʻinga ʻo e ngaahi fakamatala fika tohi kakaí (Nōmipa 1–2, 26).

ʻOku fakamatala ʻa e vahe 1–10 ki he teuteu ʻa ʻIsileli ke nau ʻalu atu mei Sainaí. ʻOku hanga ʻe he vahe 11–14 ʻo fakamatalaʻi ʻa ʻenau fonongá, ko hono fekauʻi atu ʻo e kau mataki ki he fonua ko Kēnaní, mo e fakafisi ʻa ʻIsileli ke nau hū atu ki he fonua ʻo e talaʻofá. ʻOku fakamatala ʻa e vahe 15–19 ki ha ngaahi lao mo e ngaahi meʻa kehekehe naʻe hoko ʻi he hisitōliá. Ko e vahe 20–36 ko e hisitōlia ia ʻo e taʻu fakaʻosi ʻo e kakaí ʻi he toafá.