Tefito ʻo e Tuí, Ngaahi

Ko e ngaahi tefito mahuʻinga ʻo e tui ʻe hongofulu mā tolu ʻoku tui ki ai ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe ʻuluaki tohi ia ʻe Siosefa Sāmita ʻi ha tohi kia Sione Ueniuefi, ko e ʻētita ʻo e nusipepa ko e Chicago Democrat (Tekomakalati Sikākoú), ʻi he tali ki heʻene kole ke ne ʻilo ki he ngaahi meʻa ʻoku tui ki ai ʻa e kāingalotu ʻo e Siasí. Naʻe ʻiloa ʻa e tohí ko e Tohi ʻa Ueniuefí pea naʻe ʻuluaki pulusi ia ʻi he Times and Seasons (Ngaahi Kuonga mo e Ngaahi Faʻahitaʻú) ʻi Māʻasi 1842. Naʻe tali ʻa e Ngaahi Tefito ʻo e Tuí ʻi he ʻaho 10 ʻo ʻOkatopa 1880 ke hoko ko e folofola ʻi he loto ki ai ʻa e kāingalotu ʻo e Siasí pea fakakau ia ʻo hoko ko e konga ʻo e Mataʻitofe Mahuʻingá.