ʻEkesōtosi

Ko ha tohi naʻe hiki ʻe Mōsese ʻi he Fuakava Motuʻá ʻa ia ʻoku fakamatala ki he ʻalu atu ʻa e kau ʻIsilelí mei ʻIsipite. ʻOku lava ʻo vahevahe ʻa e hisitōlia ʻo ʻIsileli ʻa ia ʻoku tohi ʻi he ʻEkesōtosí ki ha konga ʻe tolu: (1) ko e nofo pōpula ʻa e kakaí ʻi ʻIsipité; (2) ko ʻenau ʻalu atu mei ʻIsipité ʻi he takimuʻa ʻa Mōsese kiate kinautolu; mo e (3) ko ʻenau ngāue mateaki ʻi he ngāue ʻa e ʻOtuá ʻi heʻenau moʻui fakalotú mo ʻenau moʻui fakapolitikalé.

Ko e ʻuluaki kongá, vahe 1–15, ʻoku fakamatala ia ki he nofo pōpula ʻa ʻIsileli ʻi ʻIsipité; ko e kamataʻanga ʻo hono hisitōliá mo hono ui ʻo Mōsesé; ko e ʻEkesōtosí mo hono kamata ʻo e Laka Atú (Pāsová); mo e fononga atu ʻi he Tahi Kulokulá, ko hono fakaʻauha ʻo e kau tau ʻa Feló, mo e hiva ʻo e ikuna ʻa Mōsesé.

Ko e konga hono uá, vahe 15–18, ʻoku fakamatala ia ki hono huhuʻi ʻo ʻIsilelí mo e ngaahi meʻa naʻe hoko ʻi he fononga atu mei he tahi Kulokulá ki Sainaí; ko e ngaahi vai kona ʻo Malá, ko hono foaki mai ʻo e fanga kueilí mo e maná, ko hono tauhi ʻo e Sāpaté, ko e mana ʻo hono foaki mai ʻo e vai ʻi Lefitimí pea mo e tau ʻi ai mo e kau ʻAmalekí; ko e aʻu mai ʻa Setelō ki he ʻapitangá pea mo ʻene faleʻi ʻo kau ki hono puleʻi fakasivile ʻo e kakaí.

Ko e konga hono tolú, vahe 19–40, ʻoku fakamatala ia ki he fakatapui ʻa ʻIsileli ke nau fai ʻa e ngāue ʻa e ʻOtuá lolotonga ʻo e ngaahi meʻa molumalu naʻe hoko ʻi Sainaí. ʻOku fakamavaheʻi ʻe he ʻEikí ʻa e kakaí ko ha puleʻanga ʻo e kau taulaʻeikí, mo ha puleʻanga toputapu, peá ne foaki mai ʻa e Fekau ʻe Hongofulú; pea fai mai mo e ngaahi fakahinohino ʻo kau ki he tāpanekalé, mo hono ngaahi nāunaú, pea mo e lotu ʻi aí. Hili ia naʻe hoko mai leva ʻa e fakamatala ki he angahala ʻa e kakaí ʻi heʻenau hū ki he ʻuhikiʻi pulu koulá, pea toki fakamuimui ʻaki ʻa e fakamatala ki hono langa ʻo e tāpanekalé mo e ngaahi fakahinohino ki he anga ʻo e lotu ʻoku fai ʻi aí.