Tokāteline mo e Ngaahi Fuakavá

Ko hano fakatahaʻi ia ʻo e ngaahi fakahā fakalangi ʻi he ngaahi ʻaho ki mui ní mo e ngaahi fanongonongo fakamafaiʻi fakalaumālie. Naʻe fakahā ʻeni ʻe he ʻEikí kia Siosefa Sāmita mo e niʻihi ʻo kinautolu ki mui ʻiate iá ki hono fokotuʻu mo hono puleʻi ʻo e puleʻanga ʻo e ʻOtuá ʻi he māmaní ʻi he ngaahi ʻaho fakaʻosí. ʻOku hoko ʻa e Tokāteline mo e Ngaahi Fuakavá ko e taha ʻo e ngaahi tohi folofola fakamafaiʻi ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, fakataha mo e Tohi Tapú, ko e Tohi ʻa Molomoná, mo e Mataʻitofe Mahuʻingá. Ka neongo iá ʻoku makehe ʻa e Tokāteline mo e Ngaahi Fuakavá ia, koeʻuhi ʻoku ʻikai ko hano liliu ia ʻo ha ngaahi tohi fakakuongamuʻa; kuo foaki mai ai ʻe he ʻEikí ʻa e ngaahi fakahaá ni ki heʻene kau palōfita kuó ne fili ʻi he ʻaho fakaonopooni ko ʻení koeʻuhí ko hono fakafoki mai ʻo hono puleʻangá. ʻOku fanongo ha taha ʻi he ngaahi fakahaá ki he leʻo ʻofa mo fakapapau ʻo e ʻEiki ko Sīsū Kalaisí (T&F 18:35–36).

Naʻe pehē ʻe he Palōfita ko Siosefa Sāmitá, ko e Tokāteline mo e Ngaahi Fuakavá ko e makatuʻunga ia ʻo e Siasí ʻi he ngaahi ʻaho fakaʻosí pea ko ha tāpuaki ia ki he māmaní (T&F 70: ʻuluʻi fakamatalá). ʻOku hanga ʻe he ngaahi fakahā ʻi aí ʻo kamata ʻa e ngāue ki hono teuteu ʻo e hala ki he hāʻele ʻanga ua mai ʻa e ʻEikí, ʻi hono fakahoko ʻo e ngaahi folofola kotoa pē kuo lea ʻaki ʻe he kau palōfitá talu mei he kamataʻanga ʻo e māmaní.