Peali

Ko ha ʻotua-laʻā tangata naʻe lotu ki ai ʻa e kakaí ʻi Finisia (1 Ng. Tuʻi 16:31) ka naʻe toe lotu foki ki ai mo ha ngaahi feituʻu kehekehe ʻi ha ngaahi founga kehe: ko e kau Mōapé ka naʻe ui ia ko Peali-peoli (Nōmipa 25:1–3), pea ʻi Sīkemi ʻo ui ko Peali-piliti (Fakam. 8:33; 9:4), mo ʻEkiloni ko Peali-sepupi (2 Ng. Tuʻi 1:2). Mahalo ʻoku tatau pē ʻa Peali ʻo Pāpiloné mo Peali, pea mo Siesi (Zeus) ʻo Kalisí. ʻOku hanga ʻe he foʻi lea Pealí ʻo fakamatalaʻi ʻa e fetuʻutaki ʻi he vahaʻa ʻo ha ʻeiki mo ʻene pōpula. Ko e fakatātā ʻoku faʻa ngāue ʻaki ki hono fakatātaaʻi ʻo Pealí ko ha fuʻu pulu. Ko ʻAsiteloti ʻa e ʻotua fefine ʻoku faʻa lotu fakataha ki ai mo Pealí.

ʻOku ʻi ai ʻa e taimi ʻe niʻihi ʻoku fakatahaʻi ai ʻa e Pealí mo ha hingoa pe foʻi lea kehe ke fakamahinoʻi ʻaki haʻane fetuʻutaki mo Peali, ʻo hangē ko ha feituʻu ʻoku fai ai ʻa e lotu kiate iá pe ko ha taha ʻokú ne maʻu ʻa e ngaahi ʻulungāanga ʻoku hangē ko ia ʻoku maʻu ʻe Pealí. Ka ko e meʻa ʻi he fekauʻaki ʻa Peali mo e ngaahi ʻuhinga koví, naʻe fetongi ʻaki leva ki mui ʻa e foʻi lea Bosheth ʻa e ngaahi hingoa fakatahaʻi ko iá. Ko hono ʻuhinga ʻo e Posetí (Bosheth) ko e “meʻa fakamā.”