Hilamani, Foha ʻo Hilamaní
Ko ha palōfita ko e tokotaha tauhi lekooti ʻi he Tohi ʻa Molomoná ʻa ia naʻá ne akoʻi ʻa e kakai Nīfaí. Ko e mokopuna ia ʻo ʻAlamā ko e Siʻí pea ko e tamai ia ʻa Nīfai ko ia naʻe foaki ki ai ʻa e mālohi ki he ngaahi ʻelemēniti kotoa pē (Hilam. 5–10). Naʻe tohi ʻe Hilamani mo hono foha ko Nīfaí ʻa e tohi ʻa Hilamaní.
Ko e tohi ʻa Hilamaní
ʻOku hanga ʻe he vahe 1–2 ʻo fakamatalaʻi ha taimi ʻo e faingataʻa fakapolitikale lahi. ʻOku tohi ʻi he vahe 3–4, ʻa e faifai pea lava ʻe Hilamani mo Molonaihā ʻa ia ko e ʻeikitau pule ʻo e ngaahi kau tau ʻa e kau Nīfaí, ʻo fokotuʻu ʻa e melinó ʻi ha kiʻi taimi. Ka neongo iá, neongo ʻa e takimuʻa ʻa e ongo tangata lelei ko ení, ka naʻe fakautuutu ai pē ʻa e fakaʻau ke fai angahala lahi ange ʻa e kakaí. ʻOku fakamatala ʻa e vahe 5–6 ki he tukuange ʻe Nīfai ʻa e nofoʻanga fakamāú, ʻo hangē ko ia naʻe fai ʻe heʻene kui ko ʻAlamaá, ke ʻalu ʻo akoʻi ʻa e kakaí. Naʻe kamata ke fakatomala ʻa e kakaí ʻi ha kiʻi vahaʻataimi. Ka neongo iá, ʻoku fakamatala ʻa e vahe 6–12 ki he kamata ke toe fai angahala ʻa e puleʻanga Nīfaí. ʻOku tohi ʻi he ngaahi vahe fakaʻosí, vahe 13–16, ha fakamatala makehe ʻo kau ki he palōfita ko hono hingoá ko Samuela ko e Tangata Leimaná, ʻa ia naʻá ne tomuʻa fakahā hono ʻaloʻi mo hono kalusefai ʻo e Fakamoʻuí pea mo e ngaahi fakaʻilonga te ne fakahā ʻa e ngaahi meʻa ko iá.