Ko e ʻitá ko hano fakaʻaliʻali ia ʻo e anga ʻo e lotó. Naʻe fai mai ʻe he ʻEikí ha fakatokanga ki heʻene Kau Māʻoniʻoní ke nau mapuleʻi ʻenau ʻitá (Mātiu 5:22 ). ʻOku ʻikai ha totonu ʻa ha mātuʻa pe fānau ke ngaohikoviʻi ha niʻihi kehe ʻi he fāmilí. ʻOku faʻa fakatatau ʻi he folofolá ʻa e ʻitá ki he ʻīmisi ʻo e afi (2 Nīfai 15:25 ; T&F 1:13 ).
Pea naʻe ʻita ʻaupito ʻa Keini, pea kehe hono matá, Sēnesi 4:5 .
ʻOku tōʻohi ʻa e ʻEikí ki he houhau, ka ʻoku lahi ʻa ʻene ʻaloʻofá, Same 145:8 .
ʻOku tekeʻi atu ʻa e houhaú ʻe he tali fakavaivaí, LFkt. 15:1 .
ʻOku fakatupu ʻe he tangata faʻa ʻitá ʻa e feʻiteʻitaní; ka ʻoku lolomi ʻa e feʻiteʻitaní ʻe ia ʻoku fakatotoka ki he ʻitá, LFkt. 15:18 (LFkt. 14:29 ).
Koeʻuhi ko hoku huafá te u taʻofi hoku houhaú, ʻĪsaia 48:9 .
ʻOku mafao atu hoku nimá ki ha kakai ʻoku fakahouhau kiate au maʻu ai pē, ʻĪsaia 65:2–3 .
Ko ia te ne sipiʻi ho kouʻahe toʻomataʻú, fulihi atu foki kiate ia ho kouʻahe ʻe tahá, Mātiu 5:39 .
ʻA e ngaahi tamai ʻoua naʻa mou fakatupu lili ki hoʻomou fānaú, ʻEfesō 6:4 .
Ko e meʻa ʻi heʻeku tala kiate kimoutolu ʻa e moʻoní, ko ia kuo mou ʻita ai kiate aú, Mōsaia 13:4 .
Te u ʻaʻahi ki he kakaí ni ʻi heʻeku ʻitá, ʻAlamā 8:29 .
ʻOku ʻikai ha taha kuo tupu hono houhaú ki ai, ka ko kinautolu pē ʻoku ʻikai ke nau fakamoʻoniʻi ʻa e kau mai hono toʻukupú ʻi he meʻa kotoa pē, T&F 59:21 .
Ko au, ko e ʻEikí, ʻoku ou ʻita ki he kau fai angahalá, T&F 63:32 .