Kolosé, Tohi ki he Kakai

Ko ha tohi ʻi he Fuakava Foʻoú. Ko ha tohi ia naʻe fai ʻe he ʻAposetolo ko Paulá ki he kakai Kolosé hili ʻa e ʻaʻahi mai kiate ia ʻa Epafasi, ko e ʻevangeliō ʻo e Siasí ʻi Kolose (Kolose 1:7–8). Naʻe fakahā ʻe Epafasi kia Paula ʻoku kamata ke tō atu ʻa e kakai Kolosé ki ha ngaahi hala fakamamahi—ʻo nau pehē ʻoku nau lelei ange ʻi he kakai kehé koeʻuhi ko ʻenau tauhi pau ki he ngaahi ouau fakatuʻasino ʻe niʻihi (Kolose 2:16), pea nau taʻofi meiate kinautolu ha ngaahi fiemaʻu fakasino ʻe niʻihi, ʻo nau hū ki he kau ʻāngelo (Kolose 2:18). Naʻe hanga ʻe he ngaahi founga ngāué ni ʻo ngaohi ʻa e kakai Kolosé ke nau ongoʻi ʻoku fakamāʻoniʻoniʻi ai ʻa kinautolu. Naʻa nau toe pehē foki ʻoku nau ʻilo lahi ange ki he ngaahi meʻa lilo ʻo e ʻunivēsí ʻi he kāingalotu kehe ʻo e Siasí. Naʻe hanga ai ʻe Paula ʻi heʻene tohí, ʻo fakatonutonu ʻa kinautolu ʻaki ʻene akoʻi ange ʻoku fou mai ʻa e huhuʻí ʻia Kalaisi pē taha pea kuo pau ke tau fakapotopoto mo tauhi kiate ia.

ʻOku hoko ʻa e vahe 1 ko e pōpoaki fakafeʻiloaki ia ʻa Paula ki he kakai Kolosé. ʻOku fakatokāteline ʻa e vahe 2–3 pea ʻoku kau ai ha ngaahi fakamatala ʻoku kau kia Kalaisi ʻi heʻene hoko ko e Huhuʻí, mo hono fakatuʻutāmaki ʻo e lotu ki he meʻa halá, mo hono mahuʻinga ʻo e toetuʻú. ʻOku akoʻi ʻe he vahe 4 kuo pau ke fakapotopoto ʻa e Kau Māʻoniʻoni ʻi he ngaahi meʻa kotoa pē.