Fono ʻa Mōsesé

Naʻe foaki mai ʻe he ʻOtuá ha ngaahi fono ʻia Mōsese ki he fale ʻo ʻIsilelí ke ne fetongi ʻa e fono māʻolunga ange naʻe ʻikai te nau talangofua ki aí (ʻEke. 34; LSS, ʻEke. 34:1–2; LSS, Teut. 10:2). Naʻe kau ʻi he ngaahi fono ʻa Mōsesé ha ngaahi tefitoʻi moʻoni, ngaahi tuʻutuʻuni, ngaahi tōtōʻonga, mo e ngaahi fakaʻilonga ke fakamanatu ki he kakaí ʻa ʻenau ngaahi ngāué mo honau ngaahi fatongiá. Naʻe kau ki ai ha fekau mo e ngaahi meʻa ke fai fekauʻaki mo e angamaʻá, anga-totonú, anga-fakalotú, mo e ngaahi fekau mo e ngaahi meʻa fakatuʻasinó—kau ai mo e ngaahi feilaulaú (Lev. 1–7) ʻa ia naʻe fakataumuʻa ki hono fakamanatu kiate kinautolu ʻa e ʻOtuá mo honau fatongia kiate iá (Mōsaia 13:30). Naʻe hoko ko ha konga ʻo e fonó ʻa e tuí, fakatomalá, papitaiso ʻi he vaí, mo e fakamolemole ʻo e ngaahi angahalá, ʻo hangē pē ko e Fekau ʻe Hongofulú mo e ngaahi fekau lahi kehe ʻoku mahuʻinga ki he anga-totonú mo e angamaʻá. Naʻe fakahoko ha konga lahi ʻo e ngaahi lao fekauʻaki mo e ngaahi ouaú ʻi he pekia mo e toetuʻu ʻa Sīsū Kalaisí, ʻa ia naʻe fakangata ai ʻa e feilaulau ʻi he lilingi totó (ʻAlamā 34:13–14). Naʻe fakahoko ʻa e fonó ʻi he Lakanga Taulaʻeiki Faka-ʻĒloné pea naʻe hoko ia ko ha ongoongolelei teuteuʻanga ke tākiekina mai ai kia Kalaisi ʻa kinautolu ʻoku nau tauhi iá.