Siosefa, Foha ʻo Sēkopé

Ko e ʻuluaki foha ia ʻo Sēkope mo Lēsielí ʻi he Fuakava Motuʻá (Sēnesi 30:22–24; 37:3).

Naʻe maʻu ʻe Siosefa ʻa e ʻinasi ʻo e ʻuluaki foha ʻi ʻIsilelí, tuʻunga ʻi he mole ʻa e faingamālié meia Lūpeni ko e ʻuluaki foha ʻo Sēkope mo hono ʻuluaki malí koeʻuhi ko ʻene maumau-fono (1 Fkmtl. 5:1–2). Ka koeʻuhi ko e taau mo feʻunga ʻa Siosefa, ko e ʻuluaki foha ʻo Sēkope mo hono mali hono uá, ko ia naʻá ne fika ua hake ai ki he tāpuakí. Naʻe toe maʻu foki ʻe Siosefa mo ha tāpuaki mei heʻene Tamaí ʻi ha kiʻi taimi siʻi pē ki muʻa pea toki pekia ʻa Sēkopé (Sēnesi 49:22–26).

Ko ha tangata “angalelei mo poto” ʻa Siosefa (Sēnesi 41:39). ʻOku hoko ʻene fakafisinga ʻa e uaifi ʻo Pōtifaá ko ha sīpinga ia ʻo ʻene tuí, angamaʻá, mo e angatonu fakafoʻituituí (Sēnesi 39:7–12). ʻI he fakahā ange ʻe Siosefa ia ʻi ʻIsipite ki hono ngaahi tokouá, naʻe ʻikai te ne tukuakiʻi ʻa kinautolu ka naʻá ne fakamālō ange koeʻuhi ko e meʻa naʻa nau fai ange kiate iá. Naʻá ne tui naʻe tokoni ʻa e meʻa naʻa nau faí ki hono fakahoko ʻo e finangalo fakalangi ʻo e ʻOtuá (Sēnesi 45:4–15).

ʻOku fakahā mai ʻe he ngaahi fakahā ʻi he ngaahi ʻaho ki mui ní ʻa e misiona lahi ange ʻa e fāmili ʻo Siosefá ʻi he ngaahi ʻaho fakaʻosí (2 Nīfai 3:3–24; 3 Nīfai 20:25–27; LSS, Sēnesi 50).

Naʻe ʻofa lahi hake ʻa Sēkope ʻia Siosefa, peá ne ngaohi maʻana ʻa e kofu tuʻa pulepule, Sēnesi 37:3.
Naʻe fakatupu hake ʻe he meheká ʻa e tāufehiʻa ʻa e ngaahi tokoua ʻo Siosefá kiate ia ʻo nau faʻufaʻu ai ke tāmateʻi ia, ka naʻa nau liliu ʻo fakatau atu ia ki ha fefakatauʻaki koloa, ʻa ia naʻa nau fononga atu ki ʻIsipite, Sēnesi 37:5–36.
Naʻe ngaohi ʻe he ʻEikí ke tuʻumālie ʻa Siosefa peá ne hoko ai ko ha pule ʻi he fale ʻo Pōtifaá, Sēnesi 39:1–4.
Naʻe loi ʻa e mali ʻo Pōtifaá ʻo pehē naʻe feinga ʻa Siosefa ke kākaaʻi ia, pea fakahalaiaʻi taʻetotonu ai ʻa Siosefa ʻo tuku ʻi he fale fakapōpulá, Sēnesi 39:7–20.
Naʻe fakamatalaʻi ʻe Siosefa ʻa e misi ʻa e tangata tauhi lahi mo e tangata taʻo mā ʻa Feló, Sēnesi 40.
Naʻe kamata ke leleiʻia ʻa Felo ʻia Siosefa koeʻuhi ko hono fakamatalaʻi ʻe Siosefa ʻa e taha ʻo e ngaahi misi ʻa Feló; peá ne fokotuʻu ʻa Siosefa ko ha pule ʻi ʻIsipite kotoa, Sēnesi 41:14–45.
Ko hono fanauʻi ʻo ʻIfalemi mo Manase, Sēnesi 41:50–52.
Ko e toe fakataha ʻa Siosefa mo hono ngaahi tokouá, Sēnesi 45–46.
ʻOku pekia ʻa Siosefa ʻi ʻIsipite ʻi hono taʻu 110, Sēnesi 50:22–26.