ʻOfá

Ko ha mateaki līʻoa ia mo e loto-ʻofa. ʻOku kau ʻi he ʻofa ki he ʻOtuá ʻa e mateaki, ʻofa mamahi, ʻapasia, loto-manavaʻofa, ʻaloʻofa, faʻa fakamolemole, loto-ʻofa, ngāue-ʻofa, loto-fakafetaʻi, mo e angaʻofa. ʻOku hā ʻa e sīpinga māʻolunga taha ʻo e ʻofa ʻa e ʻOtuá ʻi he fakalelei taʻe-fakangatangata ʻa Sīsū Kalaisí.

Ke ke ʻofa ki ho kaungāʻapí ʻo hangē pē ko koe, Lev. 19:18 (Mātiu 5:43–44; 22:37–40; Loma 13:9; Kalētia 5:14; Sēmisi 2:8; Mōsaia 23:15; T&F 59:6).
Ke ke ʻofa kia Sihova ko ho ʻOtuá ʻaki ho lotó kotoa, Teut. 6:5 (Molonai 10:32; T&F 59:5).
ʻOku ʻahiʻahiʻi ʻa kimoutolu ʻe Sihova ko homou ʻOtuá, ke ʻilo pe te mou ʻofa kia Sihova ko homou ʻOtuá, Teut. 13:3.
He ko ia ʻoku ʻofa ki ai ʻa Sihová ʻokú ne tautea, LFkt. 3:12.
ʻOku ʻofa maʻu ai pē ʻa e [kaumeʻa] moʻoní, LFkt. 17:17.

Naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, Sione 3:16 (T&F 138:3).
Ke mou feʻofaʻaki ʻiate kimoutolu ʻo hangē ko ʻeku ʻofa kiate kimoutolú, Sione 13:34 (Sione 15:12, 17; Mōsese 7:33).
Kapau ʻoku mou ʻofa ʻiate au, tauhi ʻeku ngaahi fekaú, Sione 14:15 (T&F 42:29).
ʻOku ʻikai ha tangata ʻe lahi hake ʻene ʻofá ʻi he meʻá ni, ke ne foaki ʻene moʻuí koeʻuhi ko hono kāingá, Sione 15:13.
ʻE Pita, ʻokú ke ʻofa ʻiate au ʻo lahi hake ʻiate kinautolú ni? Fafanga ʻeku fanga sipi, Sione 21:15–17.
ʻOku ʻikai ha meʻa te ne fakamāvae ʻa kitautolu mei he ʻofa ʻa e ʻOtuá ʻia Kalaisi, Loma 8:35–39.
ʻOku teʻeki ai mamata ʻe ha mata ki he ngaahi meʻa ʻa ia ʻoku teuteu ʻe he ʻOtuá maʻanautolu ʻoku ʻofa kiate iá, 1 Kol. 2:9.
Kae fetauhiʻaki ʻa kimoutolu ʻi he ʻofa, Kalētia 5:13.
ʻA e [ngaahi husepāniti] mou ʻofa ki homou ʻunohó, ʻEfesō 5:25 (Kolose 3:19).
ʻOua naʻa ʻofa ki māmani, 1 Sione 2:15.
Ko e ʻOtuá ko e ʻofa, 1 Sione 4:8.
ʻOku tau ʻofa kiate ia koeʻuhí ko ʻene tomuʻa ʻofa kiate kitautolu, 1 Sione 4:19.

Naʻe mamahi ʻa Kalaisi koeʻuhi ko ʻene ʻaloʻofa ki he tangatá, 1 Nīfai 19:9.
Vivili atu ki muʻa ʻi ha ʻofa ki he ʻOtuá mo e kakai fulipē, 2 Nīfai 31:20.
Te mou akoʻi hoʻomou fānaú ke nau feʻofaʻaki mo fetauhiʻaki ʻiate kinautolu, Mōsaia 4:15.
Kapau kuo mou fie hiva ʻi he fakafetaʻi ki he ʻofa huhuʻí, ʻoku mou lava ʻo ongoʻi pehē he taimí ni? ʻAlamā 5:26.
Ke tataki ʻa kimoutolu ʻe he Laumālie Māʻoniʻoní, ʻo mou hoko ʻo faʻa kātaki pea fonu ʻi he ʻofa, ʻAlamā 13:28.
Taʻofi kotoa hoʻo ngaahi holi fakakakanó, koeʻuhi ke ke fonu ʻi he ʻofá, ʻAlamā 38:12.
Naʻe ʻikai ha fakakikihi koeʻuhi ko e ʻofa ʻa e ʻOtuá ʻa ia naʻe ʻi he loto ʻo e kakaí, 4 Nīfai 1:15.
Ko e meʻa kotoa pē ʻoku fakaafeʻi ke ʻofa ki he ʻOtuá, ʻoku ueʻi hake ia ʻe he ʻOtuá, Molonai 7:13–16.
Ko e manavaʻofá ʻa e ʻofa haohaoa ʻa Kalaisí, Molonai 7:47.
ʻOku hanga ʻe he ʻofa haohaoá ʻo tekeʻi ki tuʻa ʻa e ilifiá, Molonai 8:16 (1 Sione 4:18).