ʻEfesoó, Tohi ki he Kakai

Ko ha tohi ʻi he Fuakava Foʻoú, naʻe fai ʻe he ʻAposetolo ko Paulá ki he Kāingalotu ʻi ʻEfesoó. ʻOku mahuʻinga ʻaupito ʻa e tohí ni, he ʻoku ʻi ai ʻa e ngaahi akonaki ʻa Paula ʻo kau ki he Siasi ʻo Kalaisí.

ʻOku kau ʻi he vahe 1 ʻa e founga fetapa fakaʻapaʻapa mahení pē. ʻOku fakamatala ʻa e vahe 2–3 ki he liliu ʻoku hoko ʻi he kakaí ʻi he taimi ʻoku nau hoko ai ko e kau mēmipa ʻo e Siasí—ʻoku nau hoko ko e kaungā-kolo mo e kau Māʻoniʻoní, pea kau fakataha ʻa e kau Senitailé. mo e kau Siú ʻi he Siasi pē taha. ʻOku fakamatala ʻa e vahe 4–6 ki he ngaahi fatongia ʻo e kau ʻAposetoló mo e kau palōfitá, mo e fie maʻu ke uouongatahá, mo e fie maʻu ke ʻai ʻa e teunga tau kakato ʻo e ʻOtuá.