Siosiua
Ko ha palōfita mo e takimuʻa ʻi he Fuakava Motuʻá pea ko e tokotaha ia naʻá ne fetongi ʻa Mōsesé. Naʻe fanauʻi ia ʻi ʻIsipite ki muʻa ʻi he hola ʻa e fānau ʻa ʻIsilelí mei aí (Nōmipa 14:26–31). Naʻá ne kau mo Kēlepi ʻi he kau mataki ʻe toko hongofulu mā ua naʻe fekauʻi atu ki Kēnaní. Ko kinaua pē naʻá na fai mai ha lipooti lelei ʻo kau ki he fonuá (Nōmipa 13:8, 17–33; 14:1–10). Naʻá ne mate ʻi hono taʻu 110 (Siosiua 24:29). Naʻe hoko ʻa Siosiua ko ha faʻifaʻitakiʻanga lelei ʻo e palōfita mo e tangata tau mateakí.
Ko e tohi ʻa Siosiuá
ʻOku ui ʻa e tohi ko ʻení ʻo tau hingoa kia Siosiua koeʻuhí he ko ia ʻa e tokotaha ʻoku lahi taha ʻa e fakamatala ki ai ʻa e tohí ka ʻoku ʻikai ko hono ʻuhingá he ko ia naʻá ne hiki ʻa e tohí. ʻOku fakamatala ʻa e vahe 1–12 ki hono ikunaʻi ʻo Kēnaní; pea ʻoku fakamatala ʻa e vahe 13–24 ki he ngaahi faʻahinga ʻo ʻIsilelí ʻi heʻenau vahevahe ʻa e fonuá pea mo e ngaahi naʻinaʻi fakaʻosi ʻa Siosiuá.
ʻOku ʻi ai ha potufolofola ʻiloa mahuʻinga ʻe ua ʻi he tohi ʻa Siosiuá, ʻa ia ko ha fekau ʻa e ʻEikí kiate ia ke fakalaulauloto ki he ngaahi folofolá (Siosiua 1:8) pea mo e kalanga ʻa Siosiua ki he kakaí ke nau tauhi faivelenga ki he ʻEikí (Siosiua 24:15).