Ko ha fetuʻutaki ia ʻi he loto-ʻapasia pea mo e ʻOtuá ʻa ia ʻoku ʻo hake ai ʻe ha taha ʻa ʻene ngaahi fakafetaʻi mo kole ha ngaahi tāpuaki. ʻOku fai ʻa e ngaahi lotú ki heʻetau Tamai Fakahēvaní ʻi he huafa ʻo Sīsū Kalaisí. ʻOku lava pē ke lea ʻaki leʻo-lahi pe fai fakalongolongo pē ʻa e ngaahi lotú. ʻOku toe lava foki ke hoko ʻa e ngaahi fakakaukau ʻa ha taha ko ha lotu kapau ʻoku fakataumuʻa ia ki he ʻOtuá. ʻOku toe lava foki ke hoko ʻa e hiva ʻa e kau māʻoniʻoní ko ha lotu ki he ʻOtuá (T&F 25:12).
ʻOku ʻikai ko e taumuʻa ʻo e lotú ke liliu ʻa e finangalo ʻo e ʻOtuá, ka ke maʻu mai maʻatautolu pea mo ha niʻihi kehe foki ʻa e ngaahi tāpuaki kuo ʻosi finangalo pē ʻa e ʻOtuá ke foaki maí, ka kuo pau pē ke tau kole pea tau toki maʻu ia.
ʻOku tau lotu ki he Tamaí ʻi he huafa ʻo Kalaisí (Sione 14:13–14; 16:23–24). ʻOku tau lava moʻoni ʻo lotu ʻi he huafa ʻo Kalaisí ʻi he taimi ʻoku hoko ai ʻa e ngaahi meʻa ʻoku tau fakaʻamu ki aí ko e ngaahi meʻa ia ʻoku finangalo ki ai ʻa Kalaisí (Sione 15:7; T&F 46:30). ʻOku tau kole leva ki he ngaahi meʻa ko ia ʻoku totonu pea ʻoku lava ke foaki mai ʻe he ʻOtuá (3 Nīfai 18:20). ʻOku ʻi ai ha ngaahi lotu ʻe niʻihi ʻoku ʻikai ke tali mai ia koeʻuhí he ʻoku ʻikai ko e ngaahi meʻa ia ʻoku finangalo ki ai ʻa Kalaisi ka ʻoku tupu hake ia mei he siokita ʻa e tangatá (Sēmisi 4:3; T&F 46:9). Ko e moʻoni, kapau te tau kole ki he ʻOtuá ha ngaahi meʻa ʻoku taʻe-māʻoniʻoni, ʻe hoko ia ko hotau fakahalaiaʻi (T&F 88:65).