ʻĒmení

Ko hono ʻuhingá ko e “ʻofa ke pehē” pe “ko ia pē.” ʻOku lea ʻaki ʻa e ʻĒmení ke fakahā ʻa e tali loto-māfana pe loto-fiemālie mo e loto-taha (Teut. 27:14–26) pe ko e lea moʻoni (1 Ng. Tuʻi 1:36). Ka ʻi he ʻaho ní, ʻoku ʻosi ha lotu, fai ʻo ha ngaahi fakamoʻoni, pe ngaahi malanga, pea ʻoku lea ʻaki ʻe kinautolu ʻoku nau fanongo ki he lotú pe pōpoakí ʻa e ʻēmení ke fakamahinoʻi ʻa ʻenau loto ki ai mo ʻenau tali ia.

ʻI he kuonga ʻo e Fuakava Motuʻá, kuo pau ke lea ʻaki ʻe ha taha ʻa e ʻēmení ʻi he taimi ʻoku nau fai ai ha fakapapau (1 Fkmtl. 16:7, 35–36; Neh. 5:13; 8:2–6). ʻOku ui ʻa Kalaisi “ko e ʻĒmení, ko e fakamoʻoni angatonu mo moʻoní” (Fakahā 3:14). Naʻe toe hoko foki ʻa e ʻēmení ko e fakaʻilonga ʻo ha fuakava ʻi he Akoʻanga ʻo e Kau Palōfitá (T&F 88:133–135).