Tohi ʻa Molomoná

Ko e taha ʻo e ngaahi tohi folofola ʻe fā ʻoku tali ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko ha fakanounouʻi ia ʻe ha palōfita ʻi he kuonga muʻá ko Molomona hono hingoá ʻo e ngaahi lekooti ʻa e kakai naʻa nau nofoʻi ʻi muʻa ʻa e ongo ʻAmeliká. Naʻe tohi ia ke fakamoʻoniʻi ko Sīsū ʻa e Kalaisí. Naʻe lea ʻa e Palōfita ko Siosefa Sāmitá ʻo kau ki he lekooti ko ʻení, ʻa ia naʻá ne liliu ʻi he foaki mo e mālohi ʻo e ʻOtuá, ʻo ne pehē: “Naʻá ku fakahā ki he kau takí, ko e Tohi ʻa Molomona ko e tohi totonu taha ia ʻi he ngaahi tohi kotoa pē ʻi he māmaní, pea ko e maka-tuʻu-loto ia ʻo ʻetau tui fakalotú, pea ʻe ofi ange ha tangata ke ne ofi ange ki he ʻOtuá ʻi haʻane tauhi ki hono ngaahi akonakí, ʻi ha toe tohi kehe” (vakai ki he talateu ʻi he konga ki muʻa ʻo e Tohi ʻa Molomoná).

Ko e Tohi ʻa Molomoná ko ha lekooti fakalotu ia ʻo ha faʻahinga kakai ʻe tolu ʻa ia naʻa nau hiki mai mei he Maama Motuʻá ki he ongo konitinēniti ʻAmeliká. Naʻe taki ʻa e ngaahi kakai ko ʻení ʻe he kau palōfita ʻa ia naʻa nau hiki ʻenau ngaahi lekooti fakalotu mo fakamāmaní ʻi ha ngaahi peleti ukamea. ʻOku tohi ʻi he Tohi ʻa Molomoná ʻa e hāʻele mai ʻa Sīsū Kalaisi ki he kakai ʻi he ongo ʻAmeliká hili ʻene toetuʻú. Naʻe hoko ha nofo melino ʻi ha taʻu ʻe uangeau ʻi he hili ʻa e hāʻele mai ko ia ʻa Kalaisí.

Naʻe hanga ʻe Molonai, ʻa ia ko e palōfita mo e tauhi hisitōlia Nīfai fakaʻosí, ʻo fakamaʻu ʻa e ngaahi lekooti ne fakanounouʻi ʻo e kakai ko ʻení pea fufuuʻi ia ʻi he taʻu T.S. 421 nai. ʻI he 1823, naʻe ʻaʻahi mai ʻa Molonai kuo toe tuʻú kia Siosefa Sāmita peá ne toki foaki ki mui kiate ia ʻa e ngaahi lekooti fakakuongamuʻa mo toputapu ko ʻení ke liliu mo ʻoatu ki he māmaní ʻo hoko ko ha fakamoʻoni ʻe taha kia Sīsū Kalaisi.

Ko e vaʻa fua lahi ʻa Siosefa ʻa ia ʻoku kaka hake hono ngaahi vaʻá ʻi he funga ʻā, Sēnesi 49:22–26.
ʻE tupu hake ʻa e moʻoní mei he kelekelé, Same 85:11 (Molom. 8:16; Mōsese 7:62).
ʻE hiki hake ʻe he ʻEikí ha fuka ki he ngaahi puleʻangá pea ʻe seseʻe atu ʻa kinautolu, ʻĪsaia 5:26.
ʻE ongo mai ha leʻo mei he kelekelé, ʻĪsaia 29:4 (2 Nīfai 26:14–17).
Ko e meʻa hā mai kotoa pē kuo hoko ʻo tatau mo e ngaahi lea ʻo ha tohi kuo tāpuni, ʻĪsaia 29:11 (ʻĪsaia 29:9–18; 2 Nīfai 27:6–26).
ʻE taha pē ʻa e vaʻakau ʻo Siosefa mo Siutá ʻi he toʻukupu ʻo e ʻEikí, ʻIsikeli 37:15–20.

ʻE tupu fakataha hake ʻa e Tohi Tapú mo e Tohi ʻa Molomoná, 2 Nīfai 3:12–21.
ʻE sisiʻi atu ʻa e ngaahi lea ʻa e ʻEikí ki he ngaahi ngataʻanga ʻo e māmaní, 2 Nīfai 29:2.
Naʻe fuakava ʻa e ʻEikí mo ʻĪnosi ke ʻomi ʻa e Tohi ʻa Molomoná ki he kau Leimaná, ʻĪnosi 1:15–16.
Naʻe ʻuhinga hono tohi ʻa e Tohi ʻa Molomoná ke tau tui ki he Tohi Tapú, Molom. 7:9.
ʻE tuʻu ʻa e Tohi ʻa Molomoná ʻo hoko ko e fakamoʻoni ke talatalaakiʻi ʻa e māmaní, ʻEta 5:4.
Fehuʻi ki he ʻOtuá pe ʻoku ʻikai ke moʻoni ʻa e ngaahi meʻá ni, Molonai 10:4.