ʻAho Sāpaté

Ko ha ʻaho toputapu ia kuo vaheʻi ʻi he uike taki taha ki he mālōlō mo e lotu. Naʻe hili hono fakatupu ʻe he ʻOtuá ʻa e ngaahi meʻa kotoa pē, naʻá ne mālōlō leva ʻi hono fitu ʻo e ʻahó pea fekau ke hoko ha ʻaho ʻe taha ʻi he uike ko ha ʻaho ia ʻo e mālōlō ke tokoniʻi ʻa e kakaí ke nau manatu kiate ia (ʻEke. 20:8–11).

Naʻe tauhi ʻe he kāingalotu ʻo e Siasí ki muʻa ʻi he toe tuʻu ʻa Kalaisí ʻa e ʻaho fakaʻosi ʻo e uiké ko e Sāpaté ia, ʻo hangē ko ia naʻe fai ʻe he kau Siú. Naʻe hili pē ʻa e toetuʻú, naʻe tauhi leva ʻa e ʻuluaki ʻaho ʻo e uiké (ko e ʻaho ʻo e ʻEikí) ʻe he kāingalotu ʻo e Siasí, ʻo tatau ai pē pe ko e Siu pe Senitaile, ke fakamanatua ai ʻa e toetuʻu ʻa e ʻEikí. ʻOku kei hokohoko atu ʻe he Siasí ʻi he ʻahó ni ʻa hono tauhi ʻo e ʻaho ʻe taha ʻi he uike taki taha ko ha ʻaho sāpate toputapu ʻa ia te nau hū ai ki he ʻOtuá mo mālōlō mei heʻenau ngaahi ngāue ʻo e māmaní.

ʻOku hanga ʻe he Sāpaté ʻo fakamanatu ki he kakaí ʻa ʻenau fie maʻu ʻa e meʻakai fakalaumālié pea mo honau fatongia ke talangofua ki he ʻOtuá. Ko e taimi ko ia ʻoku taʻetokanga ai ha puleʻanga ki hono tauhi ʻo e Sāpaté, ʻoku uesia ai ʻa e ngaahi tafaʻaki kotoa pē ʻo e moʻuí pea ʻoku fakaʻauʻauhifo leva ke ʻauha ʻa ʻenau moʻui fakalotú (Neh. 13:15–18; Selem. 17:21–27).