Ngaahi Tokoni Ako
Fakahaá


Fakahaá

Ko e fetuʻutaki mai ia mei he ʻOtuá ki heʻene fānau ʻi he māmaní. ʻOku lava ke fakahoko mai ʻa e fakahaá ʻi he Maama ʻo Kalaisí pea mo e Laumālie Māʻoniʻoní ʻi he ngaahi fakahinohino, ngaahi meʻa-hā-mai, ngaahi misi, pe ngaahi ʻaʻahi mai ʻa ha kau ʻāngelo. ʻOku hanga ʻe he fakahaá ʻo ʻomi ʻa e fakahinohino ko ia te ne lava ʻo tataki atu ʻa kinautolu ʻoku tui faivelengá ki he fakamoʻui taʻengata ʻi he puleʻanga fakasilesitialé.

ʻOku fakahā mai ʻe he ʻEikí ʻa ʻene ngaahi ngāué ki heʻene kau palōfitá pea fakamoʻoniʻi mai ki he kakai tuí ʻoku moʻoni ʻa e ngaahi fakahā ʻoku fai mai ki he kau palōfitá (ʻĀmosi 3:7). ʻOku fai mai ʻe he ʻEikí ʻi he ngaahi fakahā ʻa e ngaahi fakahinohino fakafoʻituitui ki he tangata kotoa pē ʻa ia ʻoku fekumi ki aí pea ʻoku nau maʻu ʻa e tuí, pea fakatomala, mo talangofua ki he ongoongolelei ʻa Sīsū Kalaisí. Naʻe pehē ʻe Siosefa Sāmita, “Ko e Laumālie Māʻoniʻoní ko e tokotaha foaki fakahā ia,” pea “ʻe ʻikai lava ha tangata ʻo maʻu ʻa e Laumālie Māʻoniʻoní taʻe te ne maʻu ha ngaahi fakahā.”

ʻI he Siasi ʻo e ʻEikí, ʻoku hoko ʻa e Kau Palesiteni ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā maʻá e Siasí pea mo e māmaní foki. Ko e Palesiteni ʻo e Siasí pē toko taha kuo fakamafaiʻi ʻe he ʻEikí ke ne maʻu fakahā maʻá e Siasí (T&F 28:2–7). ʻOku lava ʻe he tokotaha kotoa pē ʻo maʻu ha fakahā fakafoʻituitui ke ʻaonga kiate ia.