Kalusefaí

Ko ha founga tautea tāmateʻi ʻa e kau Lomá, naʻe lahi hono ngāue ʻaki ʻi he taimi ʻo e Fuakava Foʻoú, ʻa ia naʻe tāmateʻi ai ʻa e tangatá ʻaki hono haʻi pe tuki faʻo hono ongo nimá mo e ongo vaʻé ki ha kolosi. Naʻe faʻa fai pē ia ki he kau pōpula mo e kau fai hiá māʻulalo tahá. ʻOku faʻa toki fai ʻa e kalusefaí hili hano fakamamahiʻi mo hano kauʻimaeaʻi (Maʻake 15:15). Naʻe faʻa fekauʻi maʻu pē ʻa e tokotaha ʻoku kalusefaí ke ne fua hono kolosí ki he feituʻu ʻoku fai ai hono tāmateʻí (Sione 19:16–17). Naʻe faʻa toʻo maʻu pē ʻa hono ngaahi valá ʻe he kau sōtia ko ia te nau fai hono tāmateʻí (Mātiu 27:35). ʻOku tō ʻa e kolosí ki he kelekelé ke feʻunga mo ha fute ʻe taha pe ua ʻa e mavahe ʻa e vaʻe ʻo e tokotaha ʻoku kalusefaí mei he kelekelé. Naʻe leʻohi ʻa e kolosí ʻe he kau sōtia kae ʻoua ke mate ʻa e tokotaha ʻi he kolosí, ʻa ia ʻoku faʻa aʻu hono fuoloá ki he ʻaho ʻe tolu (Sione 19:31–37).

Naʻe kalusefai ʻa Sīsū Kalaisí koeʻuhi ko hano tukuakiʻi loi ia ʻe ha kulupu ʻo ha kakai taʻetui ʻo pehē ʻokú ne fakatupu angatuʻu kia Sisa pea lea taukae ki he ʻOtua ʻi heʻene pehē ko e ʻAlo ia ʻo e ʻOtuá. Naʻe ʻai kia Sīsū ha pulupulu kulokula (Sione 19:2), mo ha tatā ʻakau talatala, mo e ngaahi founga fakamamahi kehe (Mātiu 26:67; Maʻake 14:65).