Angahalá Vakai foki ki he Angatuʻú; Fai Angahalá; Faikoví; Taʻe Faka-ʻOtuá; Taʻe-māʻoniʻoní (Kau); ʻUlí Ko e talangataʻa fakahāhā ia ki he ngaahi fekau ʻa e ʻOtuá. ʻE ʻikai monūʻia ia ʻoku ʻufiʻufi ʻene ngaahi angahalá, LFkt. 28:13. Neongo ʻa e tatau ʻo hoʻomou angahalá mo e kula ʻahoʻahó, ʻe hoko ia ke hinehina ʻo hangē ko e ʻuha hinehina, ʻĪsaia 1:18. ʻE mate ʻa e kau angahalá ka ʻe moʻui ʻa e kau māʻoniʻoní, ʻIsikeli 18. Ko e Lami ʻa e ʻOtuá te ne ʻave ʻa e ngaahi angahala ʻa e māmaní, Sione 1:29. Papitaiso ʻo fakamaʻa koe mei hoʻo angahalá, Ngāue 22:16. Ko e totongi ʻo e angahalá ko e mate, Loma 6:23. Ko ia ia ʻokú ne ʻilo ke failelei, ka ʻoku ʻikai ke faí, ko e angahala ia kiate ia, Sēmisi 4:17. Te ke ngaohi au ke u tetetete ʻi he hā mai ʻa e angahalá, 2 Nīfai 4:31. ʻE malaʻia ʻa kinautolu kotoa pē ʻoku mate ʻi heʻenau ngaahi angahalá, 2 Nīfai 9:38. Naʻe ʻikai te nau lava ʻo sio ki ha angahala ka ʻi he fakaliliʻa, ʻAlamā 13:12. ʻOua naʻá ke mahalo ʻe fakafoki koe mei he angahalá ki he fiefia, ʻAlamā 41:9–10. ʻOku ʻikai lava ʻe he ʻEikí ke ʻafio ki he angahalá ʻo momoʻi fakaʻatuʻi ia, ʻAlamā 45:16 (T&F 1:31). ʻOku ʻikai faʻa lava ʻa e fānau īkí ʻo fai angahala, Molonai 8:8. Ka fakatomala ha tangata kuo pau ke ne vete ia pea liʻaki ʻene ngaahi angahalá, T&F 58:42–43. ʻOku nofo ʻa e angahala lahi angé ʻiate ia ʻoku ʻikai fakamolemolé, T&F 64:9. Ko ia ʻoku fai angahala ki he maama lahi angé ʻe lahi ange ʻa hono fakamalaʻiaʻí, T&F 82:3. Ka ʻe foki ki he tokotaha pē ko ia ʻe fai angahalá ʻa e ngaahi angahala ʻi muʻá, T&F 82:7. Ka tau ka feinga ke ʻufiʻufi ʻetau ngaahi angahalá ʻoku mahuʻi atu leva ʻa e ngaahi langí, T&F 121:37.