Ouaú

Ko e ngaahi tōtōʻonga mo e ngaahi anga ʻoku toputapu. ʻOku kau ki he ngaahi ouaú ʻa e ngaahi ngāue ʻa ia ʻoku ʻi ai hono ngaahi ʻuhinga fakalaumālie. ʻOku toe lava foki ʻo ʻuhinga ʻa e ngaahi ouaú ki he ngaahi fono mo e ngaahi tuʻutuʻuni ʻa e ʻOtuá.

ʻOku kau ki he ngaahi ouau ʻi he Siasí ʻa e faingāue ki he mahakí (Sēmisi 5:14–15), tāpuakiʻi ʻo e sākalamēnití (T&F 20:77, 79), papitaiso ʻi he fakaukú (Mātiu 3:16; T&F 20:72–74), tāpuakiʻi ʻo e fānaú (T&F 20:70), foaki ʻo e Laumālie Māʻoniʻoní (T&F 20:68; 33:15), foaki ʻo e lakanga fakataulaʻeikí (T&F 84:6–16; 107:41–52), ngaahi ouau ʻo e temipalé (T&F 124:39), mo e mali ʻi he fuakava foʻou mo taʻengatá (T&F 132:19–20).

Ouau fakafofongá

Ko ha ouau fakalotu ia ʻoku fakahoko ʻe ha tokotaha ʻoku kei moʻui ʻo fakafofongaʻi ha taha kuo pekia. ʻOku ʻaonga ʻa e ngaahi ouau ko ʻení ʻi he taimi ʻoku tali ai ia ʻe kinautolu ʻoku fakahoko ki ai ʻa e ngaahi ouaú, pea nau tauhi ʻa e ngaahi fuakava ʻoku fekauʻaki mo iá, pea fakamaʻu ʻa kinautolu ʻe he Laumālie Māʻoniʻoni ʻo e Talaʻofá. ʻOku fakahoko ʻa e ngaahi ouau peheé ʻi he ngaahi temipalé ʻi he ʻahó ni.