Fale Lotú

Ko ha fale fakatahaʻanga ʻoku fakaʻaongaʻi ki he ngaahi meʻa fakalotu. ʻI he taimi ʻo e Fuakava Foʻoú, naʻe ʻikai ke fuʻu lahi ha ngaahi nāunau ʻi he fale lotú, ka ko ha puha pē ʻoku faʻo ai ʻa e ngaahi takainga tohi ʻoku tohi ai ʻa e fonó mo e ngaahi tohi toputapu kehé, ko ha tēpile ke fai ai ʻa e lau tohi, mo e ngaahi sea ki he kakai ʻoku haʻu ʻo lotú.

ʻOku hanga ʻe ha fakataha ʻo e kau mātuʻa ʻo e koló ʻo puleʻi ʻa e fale lotu taki taha. ʻOku nau tuʻutuʻuni pe ko hai ʻe tali ke hū ki ai mo kinautolu ʻoku ʻikai ngofua ke hū ki aí (Sione 9:22; 12:42). Ko e tokotaha mahuʻinga tahá koe pule ʻo e fale lotú (Luke 13:14; Maʻake 5:22). Ko e tokotaha ia ʻoku faʻa hoko maʻu pē ko ha tangata tohi, pea ʻokú ne tokangaʻi ʻa e falé, mo tokangaʻi ʻa e ngaahi ngāue fakalotu ʻoku fai ʻi aí. ʻOku ʻi ai ha tauhi pea ko ia ʻokú ne fai ʻa e ngaahi ngāue fakasekelitali pe fakakalaké (Luke 4:20).

Naʻe ʻi ai ha fale lotu ʻi he kolo kotoa pē ʻoku nofo ai ʻa e kau Siú, ʻi Palesitaine pe ʻi ha toe feituʻu pē. Naʻe tokoni lahi ʻeni ki hono fakamafola ʻo e ongoongolelei ʻa Sīsū Kalaisí, koeʻuhí he naʻe faʻa ngofua ki he kau faifekau ʻo e Siasí ʻi muʻá ke lea ʻi he ngaahi fale lotú (Ngāue 13:5, 14; 14:1; 17:1, 10; 18:4). Naʻe fai ʻa e meʻa tatau ʻe he kau faifekau ʻi he Tohi ʻa Molomoná (ʻAlamā 16:13; 21:4–5; 32:1), pea pehē foki ki he kau faifekau ʻi he kamataʻanga ʻo e kuonga ko ʻení (T&F 66:7; 68:1).