Ko e ʻofa haohaoa ʻa Kalaisí (Molonai 7:47 ); ko e ʻofa ia ʻoku maʻu ʻe Kalaisi ki he fānau ʻa e tangatá pea ʻoku totonu ke maʻu ʻe he fānau ʻa e tangatá ʻiate kinautolu taki tahá (2 Nīfai 26:30 ; 33:7–9 ; ʻEta 12:33–34 ); ko e ʻofa ia ʻoku māʻolunga, fakaʻeiʻeiki, mo mālohi tahá, pea ʻoku ʻikai ko ha ongoʻi ʻo ha kiʻi ʻofa pē ʻi he lotó.
ʻOku fakafuofuolahi ʻe he ʻiló, ka ʻoku langa hake ʻe he ʻofá, 1 Kol. 8:1 .
Ko e manavaʻofá, ʻa ia ko ha ʻofa ʻoku haohaoa, ʻoku māʻolunga pea muʻomuʻa taha ia ʻi he meʻa kotoa pē, 1 Kol. 13 .
Ko hono ʻuhinga ʻo e fekaú, ko e ʻofa mei he loto-maʻa, 1 Tīm. 1:5 .
Pea ki he angalelei fakakāingá ʻa e ʻofá, 2 Pita 1:7 .
Kuo fai ʻe he ʻEikí ʻa e fekau ke maʻu ʻe he kakai kotoa pē ʻa e manavaʻofá, 2 Nīfai 26:30 (Molonai 7:44–47 ).
Manatuʻi ke mou maʻu ʻa e tuí, ʻamanaki leleí, mo e manavaʻofá, ʻAlamā 7:24 .
Ko e ʻofa ʻoku maʻu ʻe he ʻEikí ki he tangatá ko e manavaʻofá, ʻEta 12:33–34 .
Kapau ʻoku ʻikai maʻu ʻe he tangatá ʻa e manavaʻofá, ʻe ʻikai te nau faʻa maʻu ʻa e potu ʻa ia kuo teuteu ʻi he nofoʻanga ʻo e Tamaí, ʻEta 12:34 (Molonai 10:20–21 ).
Naʻe tohi ʻe Molonai ʻa e ngaahi lea ʻa Molomona ʻo kau ki he tuí, ʻamanaki leleí, mo e manavaʻofa, Molonai 7 .
ʻOku hanga ʻe he manavaʻofá ʻo fakafeʻungaʻi ʻa e tangatá ki he ngāue ʻa e ʻEikí, T&F 4:5–6 (T&F 12:8 ).
Fakakofuʻi ʻa kimoutolu ʻaki ʻa e haʻi ʻo e manavaʻofá, T&F 88:125 .
Tuku ke fakafonu ho lotó ʻe he manavaʻofá, T&F 121:45 .