Mātiu
Ko ha ʻAposetolo ia ʻa Sīsū Kalaisi pea ko ia naʻá ne tohi ʻa e ʻuluaki tohi ʻi he Fuakava Foʻoú. Ko Mātiú, ko ha Siu ia ʻa ia naʻá ne hoko ko ha tānaki tukuhau maʻá e kau Lomá ʻi Kapaneume, pea mahalo naʻá ne ngāue maʻa Hēlota ʻAnitipasi. Naʻe ʻiloa ia ki muʻa ʻi heʻene uluí ko Līvai, ko e foha ʻo ʻAlefiusí (Maʻake 2:14). Naʻe hili pē ha kiʻi taimi siʻi mei hono ui ke ne hoko ko e ākonga ʻa Sīsuú, naʻá ne fai ha kātoanga ʻa ia naʻe ʻi ai ʻa e ʻEikí (Mātiu 9:9–13; Maʻake 2:14–17; Luke 5:27–32). Mahalo naʻe maʻu ʻe Mātiu ha ʻilo lahi ki he ngaahi folofola ʻi he Fuakava Motuʻá, pea naʻe lava ai ke ne vakai ki hono fakahoko fakaʻāuliliki ʻo e kikité ʻi he moʻui ʻa e ʻEikí. ʻOku siʻisiʻi ʻaupito ha ʻilo ki he konga ki mui ʻo e moʻui ʻa e ʻAposetoló ni. ʻOku fakahā mai ʻe ha talatukufakaholo ʻe taha naʻá ne mate fakamaʻata.
Ko e Kōsipeli ʻa Mātiú
Ko e ʻuluaki tohi ʻi he Fuakava Foʻoú. Mahalo naʻe ʻuluaki fakataumuʻa hono tohi ʻo e Kōsipeli ʻa Mātiú ke ngāue ʻaki ʻe he kau Siu ʻi Palesitainé. ʻOku ngāue ʻaki ai ha ngaahi konga lahi naʻe toʻo mei he Fuakava Motuʻá. Ko e tefitoʻi taumuʻa ʻa Mātiú ke fakahā ko Sīsū ʻa e Mīsaia naʻe lea ʻa e kau palōfita ʻi he Fuakava Motuʻá ʻo kau ki aí. Naʻá ne toe fakamamafaʻi foki ko Sīsū ʻa e Tuʻi mo e Fakamaau ʻo e tangatá.
Vakai ki he “Kōsipelí, Ngaahi” ke maʻu mei ai ha fakamatala fakanounou ki he ngaahi vahé.