Lute
Ko e ʻofefine ʻi he fono Mōape ʻo e ongo mātuʻa ʻIsileli ko Nāomi mo ʻElimeleki ʻi he Fuakava Motuʻá. Naʻe hili ʻa e mālōlō ʻa e husepāniti ʻo Luté, naʻá ne mali leva mo Pōasi ʻa ia ko e kāinga ʻo Nāomi. Naʻe hoko hona foha ko ʻŌpetí ko e kui ia ʻa Tēvita mo Kalaisi. ʻOku hanga ʻe he talanoa kia Luté ʻo fakatātaaʻi fakaʻofoʻofa mai ʻa e liliu ʻa ha tokotaha ʻoku ʻikai ko ha ʻIsileli ʻo kau ki he lotoʻā ʻo ʻIsilelí. Naʻe liʻaki ʻe Lute ʻa hono ʻotuá mo ʻene tōʻonga moʻui ki muʻá ʻo kau fakataha mo e fale ʻo e tuí ʻi he tauhi ki he ʻOtua ʻo ʻIsilelí (Lute 1:16).
Ko e tohi ʻa Luté
ʻOku hanga ʻe he vahe 1 ʻo fakamatalaʻi ʻa e moʻui ʻa ʻElimelekí mo hono fāmilí ʻi Mōape. Naʻe hili pē ʻa e mālōlō ʻa e husepāniti ʻo Nāomi mo Luté, naʻá na foki leva ki Pētelihema. ʻOku fakamatala ʻa e vahe 2 naʻe tufi ʻuluʻuluʻi uite ʻa Lute ʻi he ngaahi ngoueʻanga ʻa Pōasí. ʻOku fakamatala ʻa e vahe 3 ki hono fakahinohinoʻi ʻe Nāomi ʻa Lute ke ʻalu ki he feituʻu hahaʻanga uité ʻo tokoto ʻi he vaʻe ʻo Pōasí. Ko e vahe 4 ko e talanoa ia ki he mali ʻa Lute mo Pōasí. Naʻa na maʻu ha foha, ko ʻŌpeti hono hingoá ʻa ia naʻe haʻu ʻi hono hakó ʻa Tēvita mo Kalaisi.