ʻEta

Ko ha tohi ʻi he Tohi ʻa Molomoná ʻa ia ʻoku kau ki ai ha ngaahi konga ʻo e lekooti ʻo e kau Sēletí. Ko e kau Sēletí ko ha kakai ia naʻa nau nofo ʻi he hemisifia hihifó ʻi ha ngaahi senituli lahi ki muʻa ʻi he kakai ʻo Līhaí. Naʻe maʻu ʻa e tohi ʻa ʻEtá mei ha ngaahi peleti ʻe uofulu mā fā naʻe maʻu ʻe he kakai ʻo Limihaí (Mōsaia 8:8–9).

ʻOku fakamatala ʻa e vahe 1–2 ki he anga ʻo e mavahe ʻa e kau Sēletí mei honau ʻapí ʻi he taimi ʻo e Taua ʻo Pēpelí ʻo kamata ʻenau fononga mai ki he fonua ko ia ʻoku ui he taimí ni ko e konitinēniti ʻAmeliká. ʻOku fakamatala ʻa e vahe 3–6 ki he mamata ʻa e tokoua ʻo Sēletí ki he Fakamoʻuí ʻi he tuʻunga fakalaumālié pea mo e folau mai ʻa e kau Sēletí ʻi ha ngaahi vaka lafalafa ʻe valu. ʻOku hoko atu ʻa e fakamatalá ʻi he vahe 7–11 ki he hisitōlia ʻo e fai angahala ko ia naʻe moʻua ai ʻa e konga lahi ʻo e hisitōlia ʻo e kau Sēletí. Naʻe tohi leva ʻe Molonai ʻa ia naʻá ne fakatonutonu ʻa e lekooti ʻa ʻEtá, ʻa e vahe 12–13 ʻo kau ki he ngaahi meʻa fakaofo naʻe fakahoko ʻi he tui kia Kalaisi pea mo e Selūsalema Foʻou ʻe hoko maí. ʻOku fakamatala ʻa e vahe 14–15 ki he anga ʻo e hoko ʻa e kau Sēletí ko ha puleʻanga mālohi ka naʻe fakaʻauha ʻa kinautolu ʻi he tau fakalotofonua tuʻunga ʻi he fai angahalá.