Fakamāú, Tohi ʻo e Kau

Ko ha tohi ʻi he Fuakava Motuʻá. ʻOku fakamatala ʻa e tohi ʻo e kau Fakamāú ki he kakai ʻIsilelí ʻo kamata mei he pekia ʻa Siosiuá ʻo aʻu ki hono fanauʻi mai ʻo Samuelá.

Ko e vahe 1–3 ko ha talamuʻaki ia ki he tohi kotoa ʻo e kau Fakamāú. ʻOku nau fakamatalaʻi koeʻuhi naʻe ʻikai hanga ʻe he kau ʻIsilelí ʻo kapusi ʻa honau ngaahi filí (Fakam. 1:16–35), naʻe pau ai ke fepaki ʻa e kau ʻIsilelí mo e ngaahi faingataʻa: ʻo e mole ʻa e tuí, femaliʻaki mo e kakai taʻetuí, mo e tauhi tamapuá. ʻOku fakamatala ʻa e vahe 3–5 kia Tēpola mo Pēlaki ʻa ia naʻá na fakahaofi ʻa ʻIsileli mei he kau Kēnaní. ʻOku fakamatala ʻa e vahe 6–8 ki he ngaahi talanoa fakatupulekina ki he tuí ʻa ia ʻoku kau ki he ngaahi meʻa naʻe hoko kia Kitione, ʻa ia naʻe tāpuakiʻi ʻe he ʻEikí ke ne fakahaofi ʻa ʻIsileli mei he kau Mitiané. ʻOku fakamatala ʻa e vahe 9–12 ki ha kau tangata kehekehe naʻa nau hoko ko e kau fakamaau ʻi ʻIsileli, lolotonga ʻenau hē mei he ongoongoleleí mo e nofo ngaohikoviʻí. ʻOku fakamatala ʻa e vahe 13–16 ki he tupu hake mo e hinga ʻa e fakamaau fakaʻosi, ko Sāmisoní. ʻOku lava ke lau ʻa e ngaahi vahe fakaʻosí, vahe 17–21, ko ha fakalahi ʻa ia ʻoku hā mei ai hono lahi ʻo e ngaahi angahala ʻa ʻIsilelí.