¶ 1 BEA nae alu ki Sikemi a Abimileki koe foha o Jelubeali ki he kaiga o ene fa‘e, bea alea ia mo kinautolu, bea mo kinautolu kotoabe nae i he fale oe tamai a ene fa‘e, o behe,

2 Oku ou kole kiate kimoutolu, mou lea i he teliga oe kau tagata o Sikemi, Kofe ia oku lelei, ae bule kiate kimoutolu ae gaahi foha kotoabe o Jelubeali, koe toko fitugofulu, be koe bule ae toko taha kiate kimoutolu? mou manatu foki oku o ho mou hui mo ho mou kakano au.

3 Bea nae lea ai ae kaiga o ene fa‘e i he teliga oe kau tagata kotoabe o Sikemi i he gaahi lea ni: bea nae tokaga leva ho nau loto ke muimui ia Abimileki: he naa nau behe, ko ho tau kaiga ia.

4 Bea naa nau atu kiate ia ae koga siliva e fitugofulu mei he fale o Beali‐biliti, aia nae ave e Abimileki o foaki ki he kau tagata kovi mo vaivaiga aia nae muimui iate ia.

5 Bea naa ne alu ki he fale o ene tamai i Ofila, o ne tamate‘i hono kaiga koe gaahi foha o Jelubeali e toko fitugofulu, i he fuga maka be taha: ka nae hao a Jotame koe foha kimui o Jelubeali: he naa ne fufu ia.

6 Bea nae fakataha ae kau tagata kotoabe o Sikemi, moe fale kotoa o Milo, bea naa nau alu, o fakanofo a Abimileki ke tu‘i, i he mala‘e oe bou aia nae i Sikemi.

¶ 7 Bea i he e nau tala ia kia Jotame, nae alu ia o tuu i he tumutumu oe mouga ko Kelisimi, bea hiki hono le‘o, o kalaga, o ne behe kiate kinautolu, Fanogo kiate au, akimoutolu ae kau tagata o Sikemi, koeuhi ke tokaga ae Otua kiate kimoutolu.

8 Nae alu atu ae gaahi akau i he kuoga e taha ke fakanofo ha tu‘i kiate kinautolu; bea naa nau behe ki he olive, Ke ke bule koe kiate kimautolu.

9 Ka nae behe e he olive kiate kinautolu, He teu tuku eku lelei aaku aia oku tubu ai iate au e nau fakaabaaba ki he Otua moe tagata, beau alu ke hoko koe maoluga au i he gaahi akau?

10 Bea nae behe e he gaahi akau ki he fiki, Ha‘u koe, o bule kiate kimautolu.

11 Ka nae behe e he fiki kiate kinautolu, E lelei eku tuku eku huamelie, mo eku fua lelei, beau alu ke hoko au ke maoluga ki he gaahi akau?

12 Bea nae behe e he gaahi akau ki he vaine, Ha‘u koe, o bule kiate kimautolu.

13 Bea nae behe e he vaine kiate kinautolu, E lelei eku tuku eku uaine, aia oku ne fakafiemalie ae Otua moe tagata, beau alu ke hoko ke bule ki he gaahi akau?

14 Bea nae behe e he gaahi akau kotoabe ki he talatalaamoa, Ha‘u koe, o bule kiate kimautolu.

15 Bea nae behe e he talatalaamoa ki he gaahi akau, Kabau oku mou fakanofo mooni au koe tu‘i kiate kimoutolu, mou ha‘u o falala ki hoku malu: bea kabau e ikai, tuku ke ha‘u ae afi mei he talatalaamoa o fakaauha ae gaahi sita o Lebanoni.

16 Bea koeni, kabau kuo mou fai mooni, mo totonu, i hoo mou fakanofo a Abimileki ke tu‘i, bea kabau kuo mou fai lelei kia Jelubeali mo hono fale, mou fai kiate ia o fakatatau ki he gaue lelei a hono nima:

17 (He nae tau eku tamai maa moutolu, o ne liaki mooni ene moui, o ne fakamoui ai akimoutolu mei he nima o Mitiane:

18 Bea kuo mou tuu hake he aho ni ki he fale o eku tamai, bea kuo mou tamate‘i hono gaahi foha, koe tagata e toko fitugofulu, i he maka be taha, bea kuo mou fakanofo a Abimileki, koe tama a ene kaunaga, ke tu‘i ki he kau tagata o Sikemi, koeuhi ko ho mou kaiga ia;)

19 Bea koeni, kabau kuo mou fai mooni mo agatonu kia Jelubeali, bea ki hono fale he aho ni, mou fiefia ia Abimileki, bea tuku ke vikiviki ia iate kimoutolu:

20 Bea kabau oku ikai, tuku ke ha‘u ae afi mei a Abimileki o fakaauha ae kau tagata o Sikemi, moe fale o Milo; bea ha‘u ae afi mei he kau tagata o Sikemi, bea mei he fale o Milo, bea fakaauha a Abimileki.

21 Bea nae lele a Jotame o hola, bea ne alu ki Biea, bea nofo ai, i he manavahe kia Abimileki ko hono tokoua.

¶ 22 Bea hili ae ta‘u e tolu mo ene bule a Abimileki ki Isileli,

23 Nae fekau e he Otua ae laumalie kovi kia Abimileki moe kau tagata o Sikemi: bea nae fai fakakākā e he kau tagata o Sikemi kia Abimileki.

24 Koeuhi ke hoko ae kovi nae fai ki he gaahi foha e toko fitugofulu o Jelubeali, mo ho nau toto, kia Abimileki ko ho nau tehina, aia naa ne tamate‘i akinautolu; bea ki he kau tagata o Sikemi, akinautolu naa nau tokoni ia i he tamate‘i o hono gaahi kaiga.

25 Bea nae fakanofo e he kau tagata o Sikemi ae kau tagata ke lamaji ia i he tumutumu oe gaahi mouga, bea naa nau kaihaaji mei he kakai kotoabe nae alu i he hala ofi kiate kinautolu: bea nae fakaha ia kia Abimileki.

26 Bea nae ha‘u a Keali koe foha o Ebeti mo hono gaahi kaiga, o nau hoko ki Sikemi: bea nae tui kiate ia ae kau tagata o Sikemi.

27 Bea naa nau alu kituaa ki he goue, o tanaki e nau goue vaine, o nau malakaki e nau gaahi kalebi, bea fai ae fiefia, o nau hu ki he fale o ho nau otua, o nau kai mo inu, bea naa nau kabe‘i a Abimileki.

28 Bea nae behe e Keali koe foha o Ebeti, Kohai a Abimileki, bea kohai a Sikemi, koeuhi ke tau tauhi ia? ikai koe foha ia o Jelubeali? mo Sebuli ko ene matābule? mou tauhi ae kau tagata o Hemoa koe tamai a Sikemi: he koe umaa e mau tauhi kiate ia?

29 Amujiaage e au ki he Otua kuo i hoku lalo nima ae kakai ni! bea teu toki hiki a Abimileki. Bea behe eia kia Abimileki, Fakatokolahi hoo kau tau, bea ke ha‘u kituaa.

¶ 30 Bea i he fanogo a Sebuli koe bule oe kolo ki he gaahi lea a Keali koe foha o Ebeti, nae tubu ai ene ita.

31 Bea nae fekau fakalilolilo kia Abimileki, o behe, Vakai, ko Keali koe foha o Ebeti mo hono gaahi kaiga kuo nau ha‘u ki Sikemi: bea vakai, oku nau teu ae kolo ni ko ho tau‘i:

32 Bea ko eni ke ke hake i he bouli akoe moe kakai oku iate koe, bea toka ae malumu i he goue:

33 Bea e behe, i he hobo leva ae laa abogibogi, ke ke tuu hake leva o tau‘i ae kolo: bea, vakai, oka alu atu ia moe kakai oku iate ia ke tau‘i koe, te ke toki fai kiate kinautolu o hage koe faa fai o ho nima.

¶ 34 Bea nae tuu hake a Abimileki, moe kakai kotoabe nae iate ia, i he bouli, bea naa nau vahe fa akinautolu o malumu ki Sikemi.

35 Bea nae alu atu a Keali koe foha o Ebeti, o ne tuu i he huaga ki he mataba oe kolo: bea nae tuu hake a Abimileki, moe kakai nae iate ia, mei he e nau toka malumu.

36 Bea i he mamata a Keali ki he kakai, nae behe eia kia Sebuli, Vakai, oku alu hifo ae kakai mei he gaahi tumutumu oe mouga. Bea nae behe e Sebuli kiate ia, Oku ke mamata ki he malu oe mouga o lau ia koe kakai.

37 Bea nae toe lea a Keali o behe, Vakai, oku alu hifo ae kakai i he loto fonua, bea koe kakai e taha oku aluage o ofi ki he tafagafaga o Mioninimi.

38 Bea nae behe e Sebuli kiate ia, Ko eni kuo ife ho gutu, aia naa ke lea ai, Kohai a Abimileki ke tau tauhi ia? ikai koe kakai eni naa ke manuki‘i? ko eni oku ou kole kiate koe, ke ke alu kituaa o tau‘i akinautolu.

39 Bea nae alu kituaa a Keali i he ao oe kau tagata o Sikemi, o ne tau mo Abimileki.

40 Bea nae tuli ia e Abimileki, bea nae hola ia mei hono ao, bea nae teia ae toko lahi mo lavea, o a‘u atu ki he huaga oe mataba.

41 Bea nae nofo a Abimileki i Eluma: bea nae kabuji e Sebuli a Keali mo hono kaiga, ke oua naa nau nofo i Sikemi.

42 Bea nae hoko o behe i he abogibogi, nae alu ae kakai ki he goue; bea naa nau tala ia kia Abimileki.

43 Bea nae ave eia ae kakai, o ne vahe tolu akinautolu, bea toka ae malumu i he goue, o fakajio, bea vakai, kuo ha‘u ae kakai kituaa mei he kolo; bea nae tuu hake ia kiate kinautolu, o teia akinautolu.

44 Bea nae oho atu a Abimileki moe kau tagata nae iate ia, o nau tuu i huaga ki he mataba oe kolo: bea nae tuli e he kogakau kehe e ua ki he kakai nae i he goue, o tamate‘i akinautolu.

45 Bea nae tau‘i e Abimileki ae kolo i he aho kotoa koia: bea naa ne lava‘i ae kolo, o tamate‘i ae kakai nae i ai, o ne holoki hifo ae kolo, bea nae tūtūi ia aki ae masima.

¶ 46 Bea i he fanogo ki ai ae kau tagata kotoabe oe fale tau maoluga o Sikemi, naa nau hu ki he botu oe fale oe otua ko Biliti.

47 Bea nae fakaha kia Abimileki, kuo katoa fakataha ae kau tagata kotoabe oe fale tau maoluga o Sikemi.

48 Bea nae alu hake a Abimileki ki he mouga ko Salimoni, aia moe kakai kotoabe nae iate ia; bea nae too e Abimileki ae toki hono nima, o ne ta hifo ae vaaakau mei he gaahi akau, o ne too ia, o ai ki hono uma, bea ne behe ki he kakai nae iate ia, Ko ia kuo mou mamata kuou fai, mou fakatootoo o faifaitaki kiate au.

49 Bea nae fai e he kakai kotoabe o ta hifo taki taha ae tagata ene vaaakau, o nau muimui ia Abimileki, o fokotuu ia ki he botu malohi, bea nae tutu ae botu malohi kiate kinautolu; ko ia nae mate ai ae kau tagata oe fale tau maoluga o Sikemi foki, koe kau tagata e toko afe nai, moe kau fefine.

¶ 50 Bea nae alu ai a Abimileki ki Tibesi, o ne tau‘i a Tibesi, bea ne lava‘i ia.

51 Ka nae i ai ae fale tau malohi i he loto kolo, bea nae hola ki ai ae kau tagata kotoabe moe kau fefine, mo kinautolu kotoabe oe kolo, o nau tabuni ia kiate kinautolu, bea naa nau alu hake ki he tua fale ki oluga.

52 Bea nae ha‘u a Abimileki ki he fale maoluga, o ne tau‘i ia, bea naa ne alu ofi ki he mataba oe fale maoluga ke tutu ia aki ae afi.

53 Bea nae ji hifo e he fefine ha koga oe maka momoji ki he ulu o Abimileki, koeuhi ke foa ai hono ulu.

54 Bea nae ui fakatootoo ia ki he talavou ko hono hoa tau, o ne behe kiate ia, Unuhi hoo heleta, o tamate‘i au, ke oua naa behe e he kakai iate au, Nae tamate‘i ia e he fefine. Bea nae tui ia ke aji e he ene talavou, bea naa ne mate.

55 Bea i he mamata ae kau tagata o Isileli kuo mate a Abimileki, naa nau alu taki taha ki hono botu.

56 Nae behe ae totogi e he Otua kia Abimileki i he gaahi agakovi aia naa ne fai ki he ene tamai, i he tamate‘i hono kaiga e toko fitugofulu:

57 Bea koe gaahi kovi ae kau tagata o Sikemi nae totogi ia e he Otua ki ho nau ulu: bea nae hoko kiate kinautolu ae malaia nae fakaha e Jotame koe foha o Jelubeali.