Vahe 10
1 Oku fakamāu a Isileli e Tola. 3 Ko Jaili, mo hono foha e toko tolugofulu nae ma‘u de kolo e tolugofulu. 6 Oku fakamalohi‘i a Isileli e he kakai Filisitia moe kakai Amoni. 10 Oku fekau atu akinautolu e he Otua i he e nau mamahi ki ho nau gaahi otua loi. 15 I he e nau fakatomala, oku fai ofa ia kiate kinautolu.
¶ 1 BEA nae tuu hake ki mui ia Abimileki a Tola koe foha o Bua, koe foha o Toto, koe tagata o Isaka, ke ne fakamoui a Isileli; bea nae nofo ia i Samili i he mouga o Ifalemi.
2 Bea naa ne fakamāu‘i a Isileli i he ta‘u e uofulu ma tolu, bea bekia ia, bea nae tanu ia i Samili.
¶ 3 Bea nae hoko mo ia a Jaili koe tagata o Kiliati, bea ne fakamāu eia a Isileli i he ta‘u e uofulu ma ua.
4 Bea nae toko tolugofulu hono foha naa nau heka i he gaahi asi mui e tolugofulu, bea nae tolugofulu e nau kolo, aia oku ui koe gaahi kolo o Jaili, o a‘u ki he aho ni, aia oku i he fonua o Kiliati.
5 Bea nae bekia a Jaili, bea tanu ia i Kamoni.
¶ 6 Bea nae toe fai kovi e he fānau a Isileli i he ao o Jihova, o nau tauhi a Beali mo Asiteloti, moe gaahi otua o Silia, bea moe gaahi otua o Saitoni, moe gaahi otua o Moabe, moe gaahi otua oe fānau a Amoni, moe gaahi otua oe kau Filisitia, o nau liaki a Jihova, bea nae ikai te nau tauhi ia.
7 Bea nae tubu ai ke vela ae houhau o Jihova ki Isileli, bea ne fakatau akinautolu ki he nima oe kau Filisitia, bea ki he nima oe fānau a Amoni.
8 Bea nae hogofulu ta‘u moe ta‘u e valu i he kuoga koia moe nau taomia ae fānau a Isileli: ae fānau kotoabe a Isileli nae nofo i he botu ki ko atu i Joatani i he fonua oe kau Amoli, aia oku i Kiliati.
9 Nae alu foki ae fānau a Amoni o fokotuu atu ki he kau vai e taha o Joatani ke tau‘i a Juta, bea mo Benijimani, bea moe fale o Ifalemi: koia nae mamahi lahi ai a Isileli.
10 Bea nae tagi ae fānau a Isileli kia Jihova, o behe, Kuo mau fai agahala kiate koe, koe mea i he e mau liaki ho mau Otua, moe mau tauhi foki a Beali.
11 Bea nae behe e Jihova ki he fānau a Isileli, Ikai naaku fakamoui akimoutolu mei he kakai Ijibite, bea mei he kau Amoli, bea mei he fānau a Amoni, bea mei he kau Filisitia?
12 Bea nae taomia foki akimoutolu e he kau Saitoni, moe kau Amaleki, bea moe kau Maoni: bea ne mou tagi kiate au, bea neu fakamoui akimoutolu mei ho nau nima.
13 Ka kuo mou liaki au ke tauhi ae gaahi otua kehe: koia e ikai teu kei fakamoui akimoutolu.
14 Alu o tagi ki he gaahi otua aia kuo mou fili: tuku ke nau fakamoui akimoutolu i he aho o hoo mou tuutamaki lahi.
¶ 15 Bea nae behe e he fānau a Isileli kia Jihova, Kuo mau fai agahala: ke ke fai ekoe aia oku lelei kiate koe kiate kimautolu: ka oku mau kole kiate koe ke ke fakamoui akimautolu he aho ni.
16 Bea naa nau tukuage iate kinautolu ae gaahi otua kehe nae iate kinautolu, o nau tauhi a Jihova: bea nae mamahi hono laumalie i he mamahi a Isileli.
17 Bea nae fakakatoa fakataha ai ae fānau a Amoni, o nau abitaga i Kiliati. Bea nae fakakatoa fakataha ae fānau a Isileli, o nau abitaga i Misiba.
18 Bea nae febeheaki e he kakai moe houeiki o Kiliati, Kohai ae tagata e kamata ae tau ki he fānau a Amoni? e hoko ia koe eiki ki he kakai kotoabe o Kiliati.