Fakataipé

Ko hono ngāue ʻaki ʻo ha faʻahinga meʻa ke hoko ko hono tatau pe ko e ʻīmisi ʻo ha meʻa ʻe taha kehe. ʻOku ngāue ʻaki ha faʻahinga meʻa, pe meʻa ne hoko, pe ha faʻahinga tuʻunga maheni pē ʻi he fakataipe ʻi he folofolá ke ne fakafofongaʻi ha tefitoʻi moʻoni pe akonaki ʻo e ongoongoleleí. Hangē ko ʻení, naʻe ngāue ʻaki ʻe ʻAlamā ko e palōfita ʻi he Tohi ʻa Molomoná ha tengaʻi ʻakau ke ne fakafofongaʻi ʻa e folofola ʻa e ʻOtuá, (ʻAlamā 32).

Naʻe ngāue ʻaki ʻe he kau palōfita ʻi he folofolá ʻa e fakataipé ke nau ako ai ʻo kau kia Sīsū Kalaisi. Naʻe kau ʻi he ngaahi fakaʻilonga pe fakataipe ko ʻení ʻa e ngaahi ouau (Mōsese 6:63), ngaahi feilaulau (Hepelū 9:11–15; Mōsese 5:7–8), ko e sākalamēnití (Luke 22:13–20; LSS, Maʻake 14:20–24), mo e papitaisó (Loma 6:1–6; T&F 128:12–13). ʻOku fakataipe ha ngaahi hingoa lahi ʻi he Tohi Tapú. ʻOku hanga ʻe he ouau ʻi he tāpanekale ʻi he Fuakava Motuʻá mo e fono ʻa Mōsesé ʻo fakafofongaʻi ha ngaahi moʻoni taʻengata (Hepelū 8–10; Mōsaia 13:29–32; ʻAlamā 25:15; Hilam. 8:14–15). Vakai ki he Mātiu 5:13–16; Sione 3:14–15; Sēkope 4:5; ʻAlamā 37:38–45, ke maʻu mei ai ha ngaahi fakatātā kehe.