Ko e founga naʻe hoko ai ʻa e faʻahinga ʻo e tangatá ko e kakai fakamatelie ʻi he māmani ko ʻení. ʻI he kai ʻe ʻĀtama mo ʻIvi ʻa e fua naʻe fakatapuí, naʻa na hoko ai ʻo fakamatelie, ʻa ia ko hono ʻuhingá, ko ʻena moʻulaloa ki he angahalá mo e maté. Naʻe hoko ai ʻa ʻĀtama ko e “ʻuluaki kakano” ʻi he māmaní (Mōsese 3:7). ʻOku hanga ʻe he ngaahi fakahā ʻi he ngaahi ʻaho ki mui ní ʻo fakamahinoʻi ʻoku hoko ʻa e Hingá ko ha tāpuaki, pea ʻoku totonu ke fakalāngilangiʻi ʻa ʻĀtama mo ʻIvi ko e ʻuluaki ongo mātuʻa ʻa e faʻahinga kotoa ʻo e tangatá.
Naʻe hoko ʻa e Hingá ko ha sitepu mahuʻinga ia ʻi he fakalakalaka ʻa e tangatá. Tuʻunga ʻi he ʻafioʻi ʻe he ʻOtuá kuo pau ke hoko ʻa e hingá, naʻá ne palani ai ʻi he maama fakalaumālié ke ʻi ai ha Fakamoʻui. Naʻe hāʻele mai ai ʻa Sīsū Kalaisi ʻi he vaeuaʻanga mālie ʻo taimí ke fai ʻa e fakalelei ki he hinga ʻa ʻĀtamá pea ki he ngaahi angahala fakafoʻituitui foki ʻa e tangatá ʻo kapau te nau fakatomala.