Mōsaia, Foha ʻo Penisimaní

Ko ha tohi ʻi he Tohi ʻa Molomoná. ʻOku ʻi he vahe 1–6 ha fakamatala ki he malanga mālohi ʻa e Tuʻi ko Penisimaní ki hono kakaí. Naʻe hanga ʻe he Laumālie ʻo e ʻEikí ʻo ueʻi hake honau lotó, pea naʻe ului ʻa e kakaí pea ʻikai te nau toe maʻu ha holi ke faikovi. ʻOku fakamatala ʻa e vahe 7–8 ki ha kulupu ʻo e kau Nīfaí ʻa ia naʻá nau ʻalu atu ke nofo mo e kau Leimaná. Naʻe fekauʻi atu ha niʻihi ke nau kumi kiate kinautolu. Naʻe maʻu kinautolu ʻe ʻĀmoni, ʻa ia ko e taki ʻo kinautolu naʻe fekau ke nau kumi kiate kinautolú, peá ne ʻilo ai ki he ngaahi talanoa ʻo kau ki heʻenau ngaahi faingataʻaʻia ʻi he ngaahi fakaehaua ʻa e kau Leimaná. ʻOku fakamatala ʻa e vahe 9–24 ki he fakamamahi ko iá pea mo e anga ʻo e moʻui moʻulaloa ʻa honau kau takimuʻá—ʻa Sēnifi, Noa, mo Limihai—ki he pule ʻa e kau Leimaná. ʻOku tohi foki ai mo hono fakapoongi ʻo ha palōfita ko ʻApinetai hono hingoá. Naʻe ului ʻa ʻAlamā tuʻunga ʻi he ngaahi faingataʻa naʻe hoko kia ʻApinetaí. ʻOku fakamatala ʻa e vahe 25–28 ki he ngaahi talanoa ʻo e ului ʻa e foha ʻo ʻAlamaá mo e ngaahi foha ʻe toko fā ʻo e Tuʻi ko Mōsaiá. ʻOku fokotuʻu mai ʻe he Tuʻi ko Mōsaiá ʻi he vahe 29 ke fokotuʻu ha kau fakamaau ke nau fetongi ʻa e ngaahi tuʻí. Naʻe fili ʻa ʻAlamā ko e foha ʻo ʻAlamaá ke hoko ko e ʻuluaki fakamaau lahí.