Ngaahi Tokoni Ako
Temipalé, Fale ʻo e ʻEikí


Temipalé, Fale ʻo e ʻEikí

Ko e fale moʻoni ia ʻo e ʻEikí. Kuo fekau maʻu pē ʻe he ʻEikí ki hono kakaí ke nau langa ʻa e ngaahi temipale, ʻa ia ko e ngaahi fale toputapu ia ʻoku fakahoko ai ʻe he Kāingalotu ʻoku taau mo feʻungá ʻa e ngaahi ouau toputapu ʻo e ongoongoleleí maʻanautolu pea mo e kau pekiá foki. ʻOku hāʻele mai ʻa e ʻEikí ki hono ngaahi temipalé, pea ko e ngaahi potu toputapu taha ia ki he lotú.

Naʻe hoko ʻa e tāpanekale naʻe fokotuʻu ʻe Mōsese mo e fānau ʻa ʻIsilelí ko ha temipale naʻe hikihiki holo. Naʻe fakaʻaongaʻi ia ʻe he kakai ʻIsilelí lolotonga ʻenau fononga atu mei ʻIsipité.

Ko e temipale ʻiloa taha ʻoku fakamatala ki ai ʻi he Tohi Tapú ʻa e temipale ko ia naʻe langa ʻe Solomone ʻi Selūsalemá (2 Fkmtl. 2–5). Naʻe fakaʻauha ia ʻi he taʻu 600 K.M. ʻe he kakai Pāpiloné pea naʻe toe langa foʻou ia ʻe Selupēpeli ʻi he ʻosi mei ai ha meimei taʻu ʻe teau (ʻĒsela 1–6). Naʻe tutu ha konga ʻo e temipale ko ʻení ʻi he taʻu 37 K.M., pea naʻe toe langa ia ʻe Hēlota ko e Lahí. Naʻe fakaʻauha ʻe he kakai Lomá ʻa e temipalé ʻi he taʻu T.S. 70.

Naʻe tataki ʻa e kau muimui māʻoniʻoni ʻo e ʻOtuá ʻi he Tohi ʻa Molomoná ke nau langa mo lotu ʻi he ngaahi temipale (2 Nīfai 5:16; Mōsaia 1:18; 3 Nīfai 11:1). ʻOku hoko hono langa mo hono ngāue totonu ʻaki ʻo e temipalé ko e ngaahi fakaʻilonga ia ʻo e Siasi moʻoní ʻi ha kuonga pē, pea kau ai ʻa e Siasi naʻe toe fakafoki mai ʻi hotau ʻaho ní. Ko e Temipale Ketilaní ʻa e ʻuluaki temipale naʻe langa mo fakatapui ki he ʻEikí ʻi he kuonga ko ʻení. Naʻe talu mei he taimi ko iá mo hono fakatapui ʻo e ngaahi temipale ʻi he ngaahi fonua lahi ʻi he māmaní.