Vete Hiá, Vete ʻa e Angahalá

ʻOku ngāue ʻaki ʻe he folofolá ʻa e veté ʻi ha founga ʻe ua. ʻOku ʻuhinga ʻa e veté ʻi he tafaʻaki ʻe taha, ko ha fakahā ʻe ha taha ʻa ʻene tui ki ha faʻahinga meʻa, hangē ko hono fakahā ko e Kalaisí ʻa Sīsū (Mātiu 10:32; Loma 10:9; 1 Sione 4:1–3; T&F 88:104).

Ko e tafaʻaki ʻe tahá, ʻoku ʻuhinga ʻa e veté ko hano fakahā ʻa ʻete halaia, hangē ko e vete ʻo e ngaahi angahalá. Ko e fatongia ʻo e kakai kotoa pē ke vete ʻenau ngaahi angahala kotoa pē ki he ʻEikí pea mau ʻa ʻene fakamolemolé (T&F 58:42–43). ʻOku fie maʻu ke vete ʻa e ngaahi angahalá ki he tokotaha pe niʻihi ne fai ki ai ʻa e angahalá ʻi he taimi ʻe fie maʻu aí. ʻOku totonu ke vete ʻa e ngaahi angahala mamafá ki ha ʻōfisa pule ʻo e Siasí (pea ko e pīsopé ia ʻi he taimi lahi).