Nāunaú Vakai foki ki he Maama ʻo Kalaisí; Moʻoní; Nāunaú, Ngaahi ʻOku faʻa ʻuhinga ʻa e nāunaú ʻi he folofolá ki he maama mo e moʻoni ʻa e ʻOtuá. ʻOku toe lava foki ʻo ʻuhinga ia ki ha fakafetaʻi pe fakalāngilangiʻi pe ki ha faʻahinga tuʻunga ʻo e moʻui taʻengatá pe ki he nāunau ʻo e ʻOtuá. ʻOku māʻoniʻoni ʻa Sihova ʻo e ngaahi kau taú, ʻoku fonu ʻa māmani kotoa pē ʻi hono nāunaú, ʻĪsaia 6:3 (2 Nīfai 16:3). ʻOku tau liliu ki hono tataú mei he nāunau ki he nāunau, 2 Kol. 3:18. Te ne hiki hake au ke nofo fakataha mo ia ʻi he nāunau, ʻAlamā 36:28. Ko e ngaahi nāunau ʻe maʻu ʻi he toetuʻú ʻe faikehekehe ia ʻo fakatatau ki he māʻoniʻoní, T&F 76:50–119. Ko e nāunau ʻo e ʻOtuá ko e ʻatamai potó, T&F 93:36. Ko e nāunau ʻo e ʻOtuá ke fakahoko ʻa e moʻui taʻemate mo e moʻui taʻengata ʻa e tangatá, Mōsese 1:39. Naʻá ku sio ki he Ongo Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi, SS—H 1:17.