Nīfai, Foha ʻo Līhaí

Ko ha foha māʻoniʻoni ia ʻo Līhai mo Sēlai ʻi he Tohi ʻa Molomoná (1 Nīfai 1:1–4; 2:5). Naʻe maʻu ʻe Nīfai ha tui mālohi ki he folofola ʻa e ʻOtuá (1 Nīfai 3:7) peá ne hoko ai ko ha palōfita, tokotaha tauhi lekooti mo e takimuʻa maʻongoʻonga ki hono kakaí.

Naʻá ne talangofua mo lotu ʻi he tui, 1 Nīfai 2:16.
Foki ki Selūsalema ke ʻomi ʻa e ngaahi peleti palasá, 1 Nīfai 3–4.
Foki ki Selūsalema ke ʻomi ʻa e fāmili ʻo ʻIsimelí ki he feituʻu maomaonganoá, 1 Nīfai 7.
Mamata ki he meʻa-hā-mai tatau mo ia naʻe mamata ki ai ʻa Līhaí, 1 Nīfai 10:17–22; 11.
Mamata ʻi ha meʻa-hā-mai ki he kahaʻu ʻo hono kakaí mo hono fakafoki mai ʻo e ongoongoleleí, 1 Nīfai 12–13.
Fakamatalaʻi ʻa e meʻa-hā-mai ʻo e ʻakau ʻo e moʻuí, 1 Nīfai 15:21–36.
Naʻe motuhi ʻene kaufaná ka naʻá ne maʻu pē ha meʻakai tuʻunga ʻi heʻene tuí, 1 Nīfai 16:18–32.
Foʻu ha vaka ʻo nau folau ai ki he fonua ʻo e talaʻofá, 1 Nīfai 17–18.
Naʻe mavaeua ʻa e kau Nīfaí mo e kau Leimaná, 2 Nīfai 5.
Fai ʻene fakamoʻoni fakaʻosí, 2 Nīfai 33.

Ko e tohi 1 Nīfaí

ʻOku lahi pē ʻa e fakamatala ʻa e vahe 1 ki he vahe 18:8 ki he palōfita ko Līhaí mo hono fāmilí ʻi heʻenau ʻalu atu mei Selūsalemá. Naʻa nau fononga atu ʻi he ngaahi toafa mamaté kae ʻoua kuo nau aʻu atu ki he tahí. ʻOku fakamatala ʻa e 1 Nīfai 18:9–23 ki heʻenau folau ki he fonua ʻo e talaʻofá, ʻi hono fakahinohinoʻi kinautolu ʻe he ʻEikí, pea neongo ʻa e angatuʻu ʻa Leimana mo Lēmiuelá. ʻOku fakamatala ʻa e vahe 19–22 ki he taumuʻa ʻa Nīfai ki hono tauhi ʻo e ngaahi lekōtí (1 Nīfai 6:1–6; 19:18)—ke fakalotoʻi ʻa e kakai kotoa pē ke nau manatuʻi ʻa e ʻEiki ko honau Huhuʻí. Naʻá ne lau mei he tohi ʻa ʻĪsaiá (1 Nīfai 20–21) peá ne fakamatalaʻi ʻa e ngaahi pōpoaki ʻa ʻĪsaiá, ʻi he ʻamanaki ʻe maʻu ʻe he kakai kotoa pē ha ʻilo kia Sīsū Kalaisi ko honau Fakamoʻuí mo honau Huhuʻí (1 Nīfai 22:12).

Ko e tohi 2 Nīfaí

ʻOku tohi ʻi he vahe 1–4 ha niʻihi ʻo e ngaahi akonaki mo e ngaahi kikite fakaʻosi ʻa Līhai ki muʻa peá ne pekiá, pea kau ai ʻene ngaahi tāpuaki ki hono ngaahi fohá mo honau ngaahi hakó. ʻOku fakamatala ʻa e vahe 5 ki he ʻuhinga naʻe mavahe ai ʻa e kau Nīfaí mei he kau Leimaná. Naʻe hanga ʻe he kau Nīfaí ʻo langa ha temipale, pea nau akoʻi ʻa e fono ʻa Mōsesé mo tauhi ha ngaahi lekooti. ʻOku ʻi he vahe 6–10 ʻa e ngaahi lea ʻa Sēkope, ko e tehina ʻo Nīfaí. Naʻe fakamatala ʻa Sēkope ki he hisitōlia ʻo Siutá mo e Mīsaia naʻe kikiteʻi ʻe haʻú, pea naʻe toʻo ha niʻihi ʻo e ngaahi fakamatala ko iá mei he ngaahi tohi ʻa e palōfita ko ʻĪsaiá. Naʻe tohi ʻe Nīfai ʻi he vahe 11–33 ʻa ʻene fakamoʻoni kia Kalaisí, ʻa e fakamoʻoni ʻa Sēkopé, mo e ngaahi kikite ki he ngaahi ʻaho fakaʻosí, mo ha ngaahi vahe ʻe niʻihi mei he tohi ʻa ʻĪsaia ʻi he Fuakava Motuʻá.