Tika ete eyebana epayi na bikolo nyonso, mabota nyonso, minoko nyonso, mpe bato nyonso, epayi na bango oyo buku oyo ekoya: Ete biso, na ngolu ya Nzambe Tata, mpe ya Nkolo na biso Yesu Klisto, tomonaki bapalaki kati na oyo lisolo ya makomi ezali, yango ezali lisolo ya makomi ya bato ya Nefi, mpe lisusu ya Balamani, bandeko na bango, mpe lisusu ya bato na Yelede, oyo bayaki uta na linongi oyo elobamaki. Mpe toyebi lisusu ete ebongolamaki na lisalisi ya likabo mpe nguya ya Nzambe, mpo mongongo na ye ayebisaki yango epayi na biso; yango wana toyebi na ntembe te ete mosala oyo ezali solo. Mpe totatoli lisusu ete tomonaki minkoma oyo ezali likolo ya bapalaki; mpe elakisamaki epayi na biso na nguya ya Nzambe, kasi ya moto te. Mpe tosakoli na maloba ya lokengo, ete anjelu ya Nzambe akitaki uta na lola, mpe amemaki mpe atiaki liboso ya miso na biso, ete totalaki mpe tomonaki bapalaki yango, mpe minkoma likolo na yango; mpe toyebi ete ezali na ngolu ya Nzambe Tata, mpe Nkolo na biso Yesu Klisto, ete tomonaki mpe topesi litatoli ete makambo oyo ezali solo. Mpe ezali likambo ya kokamwa na miso na biso. Nzokande, mongongo ya Nkolo etindaki biso ete topesa litatoli na yango; yango wana, mpo na kozala na botosi epayi na mitindo ya Nzambe, topesi litatoli ya makambo oyo. Mpe toyebi ete soki tozali sembo na Klisto, tokopetola bilamba na biso uta na makila na bato nyonso, mpe tokozwama bato bazanga mbindo liboso ya kiti ya bosambisi ya Klisto, mpe tokofanda elongo na ye Seko na lola. Mpe tika ete lokumu ezala na Tata, mpe na Mwana, mpe na Molimo Mosantu, baoyo bazali Nzambe moko. Amene.