1 Mpe esalemaki ete Balamani bayaki lisusu te kobunda kina mibu zomi misusu milekaka. Mpe tala, nasalisaki bato ba ngai, Banefi, na kolengeleke mboka ya bango na mandoki ma bango mpo ya ntango ya etumba.

2 Mpe esalemaki ete Nkolo alobaki epai ya ngai: Belela epai ya bato baye—Yambolani, mpe yakani epai ya ngai, mpe batisamani, mpe tongani lisusu eklezia ya ngai, mpe bokobikisama.

3 Mpe nabelelaki epai ya bato baye, kasi ezalaki na mpamba; mpe basosolaki te ete ezalaki Nkolo oyo abikisaki bango, mpe apesaki epai ya bango nkonzo yoko mpo ya boyamboli. Mpe tala bayeisaki mitema mya bango mikasi lisusu na Nkolo Nzambe wa bango.

4 Mpe esalemaki ete esilaka mibu zomi miye koleka, kosalaka, na inso, mibu nkama misato na tuku motoba uta o boyei bwa Klisto, mokonzi wa Balamani atindaki monkanda moko epai ya ngai, moye mopesaki epai ya ngai koyeba ete bazalaki kolengeleke mpo ya koya lisusu kobunda na biso.

5 Mpe esalemaki ete nasalaki ete bato ba ngai basangisa bangomei o mboka ya Mpamba, o engumba eye ezalaki o ndelo, o nzela ya nkaka eye ekambaki o kati ya mboka ya epai ya sudi.

6 Mpe kuna totiaki mampinga na biso, ete tokoka kakanga mampinga ma Balamani, ete bakoka te kobotolo yoko ya mboka ya biso; bongo tolendaki mpo ya kobunda na bango na makasi ma biso manso.

7 Mpe esalemaki ete o mobu mwa nkama misato na tuku motoba na moko Balamani bakitaki o engumba ya Mpamba kobunda na biso; mpe esalemaki ete o mobu mona tobeteki bango, mpenza ete bazongaki o mboka ya bangomei lisusu.

8 Mpe o mobu mwa nkama misato na tuku motoba na mibale bakitaki lisusu kobunda. Mpe tobeteki bango lisusu, mpe tobomaki motango moko monene mwa bango, mpe bakufi ba bango bibwakamaki o kati ya mbu.

9 Mpe sikawa, na ntina ya likambo liye linene liye bato ba ngai, Banefi, basalaka, babandaki komikumisa na makasi ma bangomei, mpe babandaki kolapa ndai liboso lya lola ete bakobekola bangomei na makila ma bandeko ba bango baye babomamaki na bayini ba bango.

10 Mpe balapaki ndai na lola, mpe lisusu na ngbende ya Nzambe, ete bakokende kobunda na bayini na bango, mpe bakokata bango na etando ya mboka mobimba.

11 Mpe esalemaki ete ngai, Molomoni, naboyaki mpenza, uta o ntango eye, kozala komanda moko mpe mokambi moko wa bato baye, na ntina ya nkuna mpe bonsomo bwa bango.

12 Tala, nakambaka bango, ata nkuna ya bango nakambaka bango mbala mingi mpo ya kobunda, mpe nalingaki bango, engebene na bolingo bwa Nzambe boye bozalaki na ngai, na motema mwa ngai mobimba; mpe bozo bwa ngai bosopanaki na losambo epai ya Nzambe bolai bwa mokolo mobimba mpo ya bango; nzokande, ezalaki na bondimi te, na ntina ya bokasi bwa mitema mwa bango.

13 Mpe mbala isato nabikisaki bango libanda lya maboko na bayini ba bango, mpe bayambolaki te masumu ma bango.

14 Mpe elapaki bango ndai na enso ena epekisamaki bango na Nkolo mpe Mobikisi wa biso Yesu Klisto, ete bakomata kobunda epai ya bayini ba bango, mpe bakobekola bangomei na makila ma bandeko ba bango, tala mongongo mwa Nkolo moyaki epai ya ngai, kolobaka:

15 Bobekoli bozali bwa ngai, mpe nakofuta lokola; zambi bato baye bayamboli te esilaka ngai kobikisa bango, tala, bakokatama mosika uta o etando ya mabele.

16 Mpe esalemaki ete ngai naboyaki mpenza komata kobunda na bayini ba ngai; mpe nasalaki kutu lokola Nkolo atindaka ngai; mpe natelemeki lokola nzeneneke moko ya mpamba mpo ya komonisa epai ya mokili makambo namonoki mpe nayokaki, engebene na mamonisi ma Molimo maye matatolaka makambo makoya.

17 Yango wana nakomi epai ya bino, Bapaganu, mpe lisusu epai ya bino, ndako ya Yisalaele, ekobanda mosala, ete bozala penepene na kolengele mpo ya kozonga o mboka ya lisango lya bino;

18 Iyo, tala, nakomi epai ya nsuka inso ya mabele; iyo, epai ya bino, mabota zomi na mabale ma Yisalaele, baye bokosambisama engebene na misala mya bino na bazomi na babale baye Yesu aponoki mpo ya kozala bayekoli ba ye o mboka ya Yelusaleme.

19 Mpe nakomi lisusu epai ya montika mwa bato baye, baye bakosambisama lokola na bazomi na babale baye Yesu aponoki o mboka eye; mpe bakosambisama na bazomi na babale basusu baye Yesu aponoki o mboka ya Yelusaleme.

20 Mpe makambo maye Molimo amonisi epai ya ngai; yango wana nakomeli bino banso. Mpe mpo ya ntina ya eye nakomi epai ya bino, ete bokoka koyeba ete banso bosengeli koteleme liboso lya kiti ya bosambisi ya Klisto, iyo, moto na moto oyo azali wa libota mobimba lya bato lya Adama; mpe bosengeli koteleme mpo ya kosambisama na misala mya bino soko mizali milamu to mibe;

21 Mpe lisusu, ete bokoka kondima nsango elamu ya Yesu Klisto, eye bokozwa o ntei ya bino; mpe lisusu ete Bayuda, bato ba boyokani bwa Nkolo, bakozwa nzeneneke mosusu na oyo bamonoki mpe bayokaki, ete Yesu oyo babomaki, azalaki Klisto mpenza mpe Nzambe mpenza.

22 Mpe nalingi ete nakoka kondimisa bino banso nsuka ya mabele koyambola mpe kolengele mpo ya koteleme liboso lya kiti ya bosambisi ya Klisto.