1 Sa ikatulo sa Oktubre, sa napulog siyam ka gatos ug napulog walo nga tuig, naglingkod ko sa akong lawak namalandong sa mga kasulatan;

2 Ug naghunahuna bahin sa dakong sakripisyo sa pag-ula nga gihimo sa Anak sa Dios, alang sa katubsanan sa kalibotan;

3 Ug sa dako ug talagsaon nga gugma nga gipakita sa Amahan ug sa Anak sa pag-anhi sa Manunubos sa kalibotan;

4 Nga pinaagi sa iyang pag-ula, ug sa pagkamasulondon sa mga baroganan sa ebanghelyo, ang katawhan maluwas.

5 Samtang naghimo ko sa ingon, ang akong hunahuna mibalik ngadto sa mga sinulat ni apostol Pedro, ngadto sa nahauna nga mga santos nga nagkatibulaag sa laing nasod sa Ponto, Galacia, Capadocia, ug sa ubang bahin sa Asya, diin ang ebanghelyo gisangyaw human gilansang sa krus ang Ginoo.

6 Gipakli nako ang Biblia ug gibasa ang ikatulo ug ikaupat nga mga kapitulo sa unang epistola ni Pedro, ug samtang ako nagbasa nadasig kaayo ako, labaw pa kaysa nangagi, sa mosunod nga mga tudling:

7 “Kay si Kristo usab sa makausa nag-antos sa mga sala, ang makiangayon alang sa dili makiangayon, nga siya unta makadala kanato ngadto sa Dios, ingon nga gipatay diha sa unod, apan gibuhi pinaagi sa Espiritu:

8 “Nga niini usab siya miadto ug misangyaw ngadto sa mga espiritu didto sa bilanggoan;

9 “Kinsa usahay mga masinupakon, nga sa kaniadto nga panahon ang taas nga pag-antos sa Dios nagpaabot sa mga adlaw ni Noe, samtang ang arka gibuhat pa, diin pipila lamang, mao kadto, ang walo ka kalag nga naluwas pinaagi sa tubig.” (1 Pedro 3:18–20.)

10 “Kay mao kini ang hinungdan nga ang ebanghelyo gisangyaw usab ngadto kanila nga mga patay na, nga sila unta mahukman sumala sa mga tawo diha sa unod, apan mabuhi sumala sa Dios diha sa Espiritu.” (1 Pedro 4:6.)

11 Samtang namalandong ko niini nga mga butang nga nahisulat, ang mga mata sa akong salabotan nabuksan, ug ang Espiritu sa Ginoo mikunsad kanako, ug akong nakita ang mga panon sa mga patay, ang dili bantogan ug bantogan.

12 Ug adunay nagpundok sa usa ka dapit nga dili maihap nga mga espiritu sa mga makiangayon, kinsa nagmatinud-anon sa pagpamatuod bahin ni Jesus samtang nagpuyo sila sa pagka-mortal;

13 Ug kinsa nakahalad og sakripisyo nga may pagkasusama sa dakong sakripisyo sa Anak sa Dios, ug nakaantos sa kalisdanan pinaagi sa ngalan sa ilang Manunubos.

14 Kining tanan mibiya sa mortal nga kinabuhi, lig-on sa paglaom sa usa ka mahimayaon nga pagkabanhaw, pinaagi sa grasya sa Dios nga Amahan ug sa iyang Bugtong Anak, si Jesukristo.

15 Nakita nako nga napuno sila sa kamaya ug kalipay, ug nagduyog sa kalipay tungod kay ang adlaw sa ilang kaluwasan haduol na.

16 Nagpundok sila nga naghulat sa pag-abot sa Anak sa Dios ngadto sa kalibotan sa mga espiritu, aron ipahayag ang katubsanan gikan sa mga higot sa kamatayon.

17 Ang ilang nahikatulog nga lawas mahibalik ngadto sa hingpit nga bayanan niini, bukog ngadto sa iyang bukog, ug ang mga ugat ug mga unod nganha niini, ang espiritu ug ang lawas pagahiusahon nga dili na gayod mabulag pag-usab, nga sila makadawat og kahingpitan sa kalipay.

18 Samtang kining dako kaayo nga pundok naghulat ug nagsultihanay, naglipay sa takna sa ilang kaluwasan gikan sa mga kadena sa kamatayon, ang Anak sa Dios, mipakita, nagpahayag sa kalingkawasan sa mga binilanggo nga nagmatinud-anon;

19 Ug didto iyang gisangyaw kanila ang walay kataposang ebanghelyo, ang doktrina sa pagkabanhaw ug ang katubsanan sa katawhan gikan sa pagkapukan, ug gikan sa kaugalingong mga sala kon sila maghinulsol.

20 Apan ngadto sa mga daotan siya wala moadto, ug taliwala sa mga dili diosnon ug sa wala maghinulsol nga mihugaw sa ilang kaugalingon samtang buhi pa, ang iyang tingog wala ipaabot;

21 Ang mga masupilon nga misalikway sa mga pagpamatuod ug sa mga pasidaan sa karaang mga propeta wala makakita sa iyang presensya, ni makakita sa iyang nawong.

22 Dinhi niini, ang kangitngit naghari, apan sa taliwala sa mga matarong adunay kalinaw;

23 Ug ang mga santos nagmaya sa ilang katubsanan, ug miluhod ug miila sa Anak sa Dios isip ilang Manunubos ug Tigluwas gikan sa kamatayon ug sa mga kadena sa impyerno.

24 Ang ilang mga panagway misanag, ug ang kahayag gikan sa presensya sa Ginoo midangat kanila, ug sila nag-awit og mga pagdayeg ngadto sa iyang balaan nga ngalan.

25 Natingala ako, kay akong nasabtan nga ang Manluluwas migahin og tulo ka tuig sa iyang pangalagad taliwala sa mga Judeo ug niadtong mga sakop sa balay ni Israel, naningkamot sa pagtudlo kanila sa walay kataposang ebanghelyo ug sa pagtawag kanila ngadto sa paghinulsol;

26 Ug, bisan pa sa iyang gamhanan nga mga buhat, ug mga milagro, ug pagpahayag sa kamatuoran, pinaagi sa dakong gahom ug katungod, adunay pipila lang ang mipatalinghog sa iyang tingog, ug nagmaya sa iyang presensya, ug midawat sa kaluwasan diha sa iyang mga kamot.

27 Apan ang iyang pangalagad taliwala niadtong mga patay na limitado ra sa mubo nga panahon tali sa pagkalansang sa krus ug sa iyang pagkabanhaw;

28 Ug naghunahuna ko sa mga pulong ni Pedro—diin miingon siya nga ang Anak sa Dios nagsangyaw didto sa bilanggoan sa mga espiritu, kinsa sa makausa masinupakon, sa panahon nga ang taas nga pag-antos sa Dios nagpaabot sa mga adlaw ni Noe—ug kon sa unsang paagi nga nahimo niya ang pagsangyaw niadtong mga espiritu ug nakahimo sa gikinahanglan nga buhat taliwala kanila sa mubo lamang kaayo nga panahon.

29 Ug samtang naghunahuna ko, ang akong mga mata nabuka, ug ang akong salabotan nalamdagan, ug akong nasabtan nga ang Ginoo wala mismo moadto taliwala sa mga daotan ug sa mga masinupakon nga misalikway sa kamatuoran, aron motudlo kanila;

30 Apan tan-awa, gikan sa taliwala sa mga matarong, miorganisar siya sa iyang mga pundok ug mitudlo og mga mensahero, sinul-oban sa gahom ug pagtugot, ug misugo kanila sa paglakaw ug pagdala sa kahayag sa ebanghelyo ngadto nila nga anaa sa kangitngit, gani ngadto sa tanan nga espiritu sa mga tawo; ug sa ingon niana ang ebanghelyo nasangyaw ngadto sa mga patay.

31 Ug ang napili nga mga mensahero miadto sa pagpahayag sa adlaw nga ikahimuot sa Ginoo ug sa pagsangyaw og kalingkawasan ngadto sa mga binilanggo nga ginapos, gani ngadto sa tanan kinsa maghinulsol sa ilang mga sala ug modawat sa ebanghelyo.

32 Sa ingon niana ang ebanghelyo gisangyaw ngadto niadtong nangamatay sa ilang mga sala, nga wala mahibalo sa kamatuoran, o sa kalapasan, nga pagsalikway sa mga propeta.

33 Gitudloan sila og pagtuo sa Dios, paghinulsol sa sala, puli nga bunyag alang sa kapasayloan sa mga sala, sa gasa sa Espiritu Santo pinaagi sa pagpandong sa mga kamot,

34 Ug sa tanang uban pang mga baroganan sa ebanghelyo nga kinahanglan nilang masayran aron mahimong takos ang ilang kaugalingon nga sila mahukman sumala sa mga tawo diha sa unod, apan mabuhi sumala sa Dios diha sa espiritu.

35 Ug sa ingon niini nga paagi kini gipahibalo taliwala sa mga patay, sa mga dili bantogan ug bantogan, sa mga daotan ingon man usab sa mga matinud-anon, nga ang katubsanan nahimo pinaagi sa sakripisyo sa Anak sa Dios pinaagi sa krus.

36 Sa ingon niana kini gipahibalo nga ang atong Manunubos migahin sa iyang panahon atol sa iyang pag-adto didto sa kalibotan sa mga espiritu, nagtudlo ug nag-andam sa matinud-anong mga espiritu sa mga propeta kinsa mipamatuod kaniya kaniadto sa buhi pa;

37 Nga ilang dad-on ang mensahe sa katubsanan ngadto sa tanang patay, ngadto sa dili niya mismo maadto, tungod sa ilang pagsupil ug kalapasan, nga sila pinaagi sa pangalagad sa iyang mga sulugoon makadungog usab sa iyang mga pulong.

38 Taliwala sa mga madungganon ug gamhanan nga gipundok niining dako kaayo nga katigoman sa mga matarong mao si Amahang Adan, ang Karaan sa mga Adlaw ug amahan sa tanan,

39 Ug ang atong mahimayaong Inahan nga si Eva, uban sa iyang daghang matinud-anong mga anak nga babaye kinsa nagpuyo sa tanang kapanahonan ug nagsimba sa tinuod ug buhi nga Dios.

40 Si Abel, ang unang martir, anaa didto, ug ang iyang igsoong lalaki nga si Seth, usa sa mga bantogan, kinsa sama og panagway sa iyang amahan, si Adan.

41 Si Noe, kinsa mihatag og pasidaan bahin sa lunop; si Shem, ang madungganon nga halangdong pari; si Abraham, ang amahan sa mga matinud-anon; si Isaac, si Jacob, ug si Moises, ang halangdon nga magbabalaod sa Israel;

42 Ug si Isaias, kinsa mipahayag pinaagi sa panagna nga ang Manunubos gidihogan aron sa pag-alim sa mga masulub-on og kasingkasing, sa pagsangyaw og kalingkawasan ngadto sa mga binilanggo, ug sa pag-abli sa bilanggoan ngadto kanila nga mga ginapos, anaa usab didto.

43 Dugang pa, si Ezequiel, nga gipakitaan sa panan-awon sa dako nga walog sa uga nga mga bukog, nga pagasul-oban og unod, nga motungha pag-usab sa pagkabanhaw sa mga patay, buhi nga mga kalag;

44 Si Daniel, nga daan nang nakakita ug nanagna sa pagkatukod sa gingharian sa Dios sa ulahing mga adlaw, nga dili na gayod magun-ob pag-usab ni ihatag ngadto sa laing mga tawo;

45 Si Elias, kinsa kauban ni Moises didto sa Bungtod sa Transpigurasyon;

46 Ug si Malaquias, ang propeta nga mipamatuod bahin sa pag-anhi ni Elijah—nga gipamulong usab ni Moroni ngadto ni Propeta Joseph Smith, nag-ingon nga siya kinahanglan nga moanhi sa dili pa magsugod ang mahinungdanon ug makalilisang nga adlaw sa Ginoo—anaa usab didto.

47 Si Propeta Elijah, ang motanom diha sa mga kasingkasing sa mga anak sa mga saad nga gihimo ngadto sa ilang mga amahan,

48 Nanagna sa mahinungdanong buhat nga pagahimoon sulod sa mga templo sa Ginoo sa dispensasyon sa kahingpitan sa mga panahon, alang sa katubsanan sa mga patay, ug sa pagselyo sa mga anak ngadto sa ilang mga ginikanan, basin pa unya og ang tibuok yuta pagahampakon sa usa ka tunglo ug hingpit nga malaglag sa iyang pag-anhi.

49 Silang tanan ug daghan pa, gani ang mga propeta kinsa mipuyo taliwala sa mga Nephita ug mipamatuod sa pag-anhi sa Anak sa Dios, miipon sa dako kaayo nga katigoman ug naghulat sa ilang kaluwasan,

50 Kay ang mga patay nagtan-aw sa dugay nang pagkawala sa ilang mga espiritu gikan sa ilang mga lawas isip pagkaulipon.

51 Sila ang gitudloan sa Ginoo, ug gipanghatagan sila og gahom nga mobangon, human sa iyang pagkabanhaw gikan sa mga patay, aron mosulod sa gingharian sa iyang Amahan, didto koronahan og pagka-imortal ug kinabuhing dayon,

52 Ug magpadayon sukad niana sa ilang paghago sama sa gisaad sa Ginoo, ug mahimong mga tig-ambit sa tanang panalangin nga gitagana alang kanila nga nahigugma kaniya.

53 Si Propeta Joseph Smith, ug ang akong amahan, nga si Hyrum Smith, si Brigham Young, si John Taylor, si Wilford Woodruff, ug ubang pinili nga mga espiritu kinsa gitagana aron motungha sa kahingpitan sa mga panahon sa pag-apil sa pagpahiluna sa mga pundasyon sa mahinungdanong buhat sa ulahing mga adlaw,

54 Lakip sa pagtukod og mga templo ug sa pagpahigayon sa mga ordinansa diha niana alang sa katubsanan sa mga patay, anaa usab didto sa kalibotan sa mga espiritu.

55 Nakita nako nga kauban usab sila sa mga hamili ug mga halangdon nga gipili sa sinugdanan aron mahimong mga magmamando sa Simbahan sa Dios.

56 Bisan sa wala pa sila matawo, sila, kauban sa daghan pa, nakadawat sa ilang unang mga leksiyon didto sa kalibotan sa mga espiritu ug giandam nga motungha sa tukmang panahon sa Ginoo aron sa paghago sa iyang ubasan alang sa kaluwasan sa mga kalag sa mga tawo.

57 Nakita nako nga ang matinud-anong mga elder niini nga dispensasyon, sa panahon nga mobiya na sila gikan sa mortal nga kinabuhi, mopadayon sa ilang mga paghago sa pagsangyaw sa ebanghelyo sa paghinulsol ug katubsanan, pinaagi sa sakripisyo sa Bugtong Anak sa Dios, taliwala niadtong anaa sa kangitngit ug ubos sa pagkaulipon sa sala didto sa dako nga kalibotan sa mga espiritu sa mga patay.

58 Ang mga patay nga naghinulsol matubos, pinaagi sa pagkamasulondon ngadto sa mga ordinansa sa balay sa Dios,

59 Ug human nga ilang mabayaran ang silot sa ilang mga kalapasan, ug mahugasan nga limpyo, makadawat og ganti sumala sa ilang binuhatan, kay sila mga manununod sa kaluwasan.

60 Sa ingon niana ang panan-awon sa katubsanan sa mga patay gipadayag ngari kanako, ug ako mopamatuod, ug nasayod ako nga kining talaan tinuod, pinaagi sa panalangin sa atong Ginoo ug Manluluwas, si Jesukristo, ug mao gayod kana. Amen.