Opisyal nga Pahayag 1
Ang Biblia ug ang Basahon ni Mormon nagtudlo nga ang pagbaton og usa lang ka asawa mao ang sumbanan sa Dios alang sa kaminyoon gawas kon mopahayag Siya sa laing paagi (tan-awa sa 2 Samuel 12:7–8 ug Jacob 2:27, 30). Human sa usa ka pagpadayag ngadto ni Joseph Smith, ang buhat sa dinaghan nga kaminyoon gihimo taliwala sa mga miyembro sa Simbahan sa sayo sa mga 1840 (tan-awa sa seksiyon 132). Gikan sa mga 1860 ngadto sa mga 1880, ang gobyerno sa Estados Unidos mipasar og mga balaod sa paghimong dili legal niining relihiyoso nga buhat. Kini nga mga balaod sa kaulahian gipatuman sa Korte Suprema sa Estados Unidos. Human makadawat og pagpadayag, si Presidente Wilford Woodruff miisyu sa mosunod nga Manipesto, nga gidawat sa Simbahan nga angay sundon ug gipatuman niadtong Oktubre 6, 1890. Kini ang hinungdan nga gihunong ang paghimo og dinaghan nga kaminyoon sa Simbahan.
Ngadto Kaniya nga Mahitungdan:
Kay adunay gipadalang mga balita alang sa mga katuyoang politikal, gikan sa Siyudad sa Salt Lake, diin lapad na kaayo ang naabot sa gimantala, tungod niini ang Utah Commission, sa ilang bag-o lang nga gitaho ngadto sa Secretary of the Interior, mipasangil nga ang dinaghan nga kaminyoon gipahigayon pa gihapon ug nga kap-atan o labaw pa sa mao nga mga kaminyoon ang gipahigayon didto sa Utah sukad sa miagi nga Hunyo o atol sa miaging tuig, nag-ingon usab nga sa publiko nga mga pakigpulong ang mga lider sa Simbahan nagtudlo, nag-awhag ug nag-aghat nga ipadayon ang pagbaton og daghang asawa—
Busa, ako, isip Presidente sa Ang Simbahan ni Jesukristo sa mga Santos sa Ulahing mga Adlaw, sa ingon niini, sa labing ligdong nga paagi, nagpahayag nga kini nga mga pasangil dili tinuod. Wala kami magtudlo og pagbaton og daghang asawa o sa dinaghan nga kaminyoon, ni motugot ni bisan kinsa nga tawo sa pagsulod ngadto sa mao nga buhat, ug ako dili moangkon nga may kap-atan o bisan unsa pa nga gidaghanon nga nalambigit sa dinaghan nga kaminyoon sulod niana nga panahon nga gipahigayon sa among mga Templo o bisan asa sa ubang dapit sa Teritoryo.
Usa ka kaso ang gikataho, diin ang mga grupo mipamatuod nga ang kaminyoon gipahigayon sa Endowment House, sa Siyudad sa Salt Lake, sa Tingpamulak sa 1889, apan wala gayod ako masayod kon kinsa ang mipahigayon sa mao nga seremonya; bisan unsa man ang nabuhat kalabot niini nga butang ako walay kasayoran. Agi og sangpotanan niining gipasangil nga hitabo ang Endowment House, pinaagi sa akong mga pahimangno, gitangtang dayon sa walay paglangan.
Kay ang mga balaod gipatuman pinaagi sa Kongreso nga nagdili sa dinaghan nga kaminyoon, diin ang mga balaod gipamulong nga konstitusyonal pinaagi sa korte sa kataposan nga dangpanan, sa ingon ako mopahayag sa akong tumong sa pagtuman niana nga mga balaod, ug sa paggamit sa akong impluwensya ngadto sa mga miyembro sa Simbahan nga akong gidumala sa pagtuman usab niini.
Wala sa akong mga pagpanudlo sa Simbahan o ngadto sa akong mga kauban, sulod sa panahon nga gipiho, diin mahimong makataronganon nga sabton ang pagtudlo o iawhag nga magbaton og daghang asawa; ug si bisan kinsa nga Elder sa Simbahan migamit og pinulongan nga ingon og nagpahayag sa bisan unsa niana nga pagtudlo, siya pagabadlongon diha dayon. Ug karon dayag nakong ipahayag sa publiko nga ang akong mga tambag ngadto sa mga Santos sa Ulahing mga Adlaw mao ang paglikay sa paghimo og bisan unsa nga kaminyoon nga gidili sa balaod sa yuta.
Wilford Woodruff
Presidente sa Ang Simbahan ni Jesukristo
sa mga Santos sa Ulahing mga Adlaw.
Si Presidente Lorenzo Snow mitanyag sa mga mosunod:
“Akong isugyot nga, sa pag-ila kang Wilford Woodruff isip ang Presidente sa Ang Simbahan ni Jesukristo sa mga Santos sa Ulahing mga Adlaw, ug mao lamang nga tawo sa yuta sa karon nga panahon nga naghupot sa mga yawe sa mga ordinansa sa pagselyo, kami moisip kaniya nga hingpit nga gitugyanan sa katungod pinaagi sa gahom sa iyang katungdanan sa pag-isyu sa Manipesto nga gibasa atol sa among husay, ug gipetsahan og ika-24 sa Septiyembre 1890, ug nga isip usa ka Simbahan nga nagkatigom sa Kinatibuk-ang Komperensiya, dawaton namo ang iyang pahayag nga may kalabotan sa dinaghan nga kaminyoon nga angay sundon ug kinahanglang ipatuman.”
Salt Lake City, Utah, October 6, 1890.
Mga kinutlo gikan sa Tulo ka Pakigpulong ni
Presidente Wilford Woodruff
Mahitungod sa Manipesto
Ang Ginoo dili gayod motugot kanako o ni bisan kinsa nga tawo nga nagbarog isip Presidente niini nga Simbahan nga dad-on kamo sa pagkahisalaag. Wala kini sa plano. Wala kini sa hunahuna sa Dios. Kon ako mangahas man niana, ang Ginoo motangtang kanako gikan sa akong dapit, ug buhaton usab Niya kini ngadto ni bisan kinsa nga tawo nga mangahas sa pagdala sa katawhan sa paghisalaag gikan sa mga orakulo sa Dios ug gikan sa ilang katungdanan. (Ikakan-oman ug usa nga Matag Tunga sa Tuig nga Kinatibuk-ang Komperensiya sa Simbahan, Lunes, Oktubre 6, 1890, Siyudad sa Salt Lake, Utah. Gibalita sa Deseret Evening News, Oktubre 11, 1890, p. 2.)
Dili igsapayan kon kinsa ang mabuhi o kinsa ang mamatay, o kinsa ang gitawag sa pagpangulo niini nga Simbahan, kinahanglang mangulo sila niini pinaagi sa inspirasyon sa Labawng Makagagahom nga Dios. Kon dili nila kini himoon sa ingon niana nga paagi, dili gayod nila kini mahimo. …
Ako adunay pipila ka pagpadayag dili pa dugay, ug hilabihan ka mahinungdanon ngari kanako, ug sultihan ko kamo kon unsay giingon sa Ginoo ngari kanako. Tugoti ako nga mopasabot kaninyo sa pulong nga manipesto. …
Giingnan ako sa Ginoo nga pangutan-on ang mga Santos sa Ulahing mga Adlaw og usa ka pangutana, ug Iya usab akong giingnan nga kon maminaw sila sa unsay akong gisulti kanila ug motubag sa pangutana nga gipangutana kanila, pinaagi sa Espiritu ug gahom sa Dios, silang tanan parehas og itubag, ug silang tanan parehas nga motuo kabahin niini nga butang.
Ang pangutana mao kini: Hain ang labing maalamon nga paagi nga angayang sundon sa mga Santos sa Ulahing mga Adlaw—ang pagpadayon ba sa pagpangahas sa paghimo sa dinaghan nga kaminyoon, diin ang balaod sa nasod supak niini ug supak ang kan-oman ka milyon nga katawhan, ug ang bugti mao ang pagsakmit ug pagkawala sa tanang Templo, ug paghunong sa tanang ordinansa diha niana, alang sa buhi ug sa mga patay, ug sa pagkabilanggo sa Unang Kapangulohan ug sa Napulog Duha ug sa mga pangulo sa mga pamilya sa Simbahan, ug pagsakmit sa kaugalingong mga kabtangan sa katawhan (tanan kini maoy makapahunong niini nga buhat); o, human sa pagbuhat ug pag-antos sa unsay atong giantos pinaagi sa atong pagsunod niini nga baroganan nga ihunong ang paghimo og dinaghan nga kaminyoon ug sundon ang balaod, ug pinaagi sa pagbuhat sa ingon magpabilin ang mga Propeta, Apostoles ug mga amahan diha sa panimalay, aron makatudlo sila sa katawhan ug makaalagad sa mga katungdanan sa Simbahan, ug usab ikabilin ang mga Templo ngadto sa mga kamot sa mga Santos, aron makapahigayon sila sa mga ordinansa sa Ebanghelyo, alang sa mga buhi ug sa mga patay?
Gipakita kanako sa Ginoo pinaagi sa panan-awon ug sa pagpadayag sa tukma nga paagi unsa ang mahitabo kon wala nato ihunong kini nga buhat. Kon wala nato kini gihunong, kamo wala na unta magkinahanglan … ni bisan kinsa nga tawo niini nga templo sa Logan; kay ang tanang ordinansa mahunong na sa tibuok yuta sa Zion. Ang kalibog mohari sa tibuok Israel, ug daghang kalalakin-an ang mahimong mga binilanggo. Kini nga kagubot mahitabo unta sa tibuok Simbahan, ug mapugos unta kita sa paghunong sa buhat. Karon, ang pangutana mao, kon kinahanglan ba kini nga hunongon niini nga paagi, o sa paagi nga gipakita sa Ginoo kanato, ug ipabilin ang atong mga Propeta ug Apostoles ug mga amahan nga gawasnong mga tawo, ug ang mga templo diha sa mga kamot sa katawhan, aron ang mga patay matubos. Daghan na kaayo ang naluwas gikan sa balay bilanggoanan sa kalibotan sa mga espiritu pinaagi niini nga katawhan, ug angay bang ipadayon ang buluhaton o ihunong? Mao kini ang pangutana nga akong gipadayag sa atubangan sa mga Santos sa Ulahing mga Adlaw. Kinahanglan kamong mohukom sa inyong kaugalingon. Gusto ko nga kamo ang motubag niini alang sa inyong kaugalingon. Dili ko kini tubagon; apan sultihan ko kamo nga kana mao gayod ang kahimtang nga atong sagubangon isip usa ka katawhan kon wala pa nato sunda ang paagi nga angay natong sundon.
… Nakita nako kon unsa gayod ang mahitabo kon wala pay gihimo nga pipila ka butang. Ania kanako kini nga espiritu sulod sa dugay nang panahon. Apan gusto kong mosulti niini: Mahimo ra gyod unta nakong tugotan nga ang tanang templo mawala sa atong mga kamot; mahimo ra gyod unta nga ako mismo mabilanggo, ug motugot nga mahiadto ang uban pang mga tawo, kon wala pa ang Dios sa langit mosugo kanako sa pagbuhat sa unsay akong gibuhat; ug sa dihang miabot ang takna nga ako gisugo sa pagbuhat niana, kining tanan klaro ngari kanako. Miadto ako sa atubangan sa Ginoo ug akong gisulat unsay gisulti sa Ginoo kanako nga isulat. …
Gisulti ko kini kaninyo, aron inyong pamalandongan ug mahunahuna. Ang Ginoo nakigtambayayong kanato. (Cache Stake Conference, Logan, Utah, Dominggo, Nobiyembre 1, 1891. Gibalita sa Deseret Weekly, Nobiyembre 14, 1891.)
Karon sultihan ko kamo kon unsay gipakita ngari kanako ug unsay gihimo sa Anak sa Dios niini nga butang. … Kining tanang butang mahitabo unta, sama kaseguro nga ang Labawng Makagagahom nga Dios buhi, kon kana nga Manipesto wala pa ikahatag. Busa, ang Anak sa Dios mibati nga kana nga butang ipakita ngadto sa Simbahan ug ngadto sa kalibotan alang sa mga katuyoan sa iyang kaugalingong mga hunahuna. Ang Ginoo nagtakda sa pag-establisar sa Zion. Siya nagtakda nga humanon kini nga templo. Iyang gimando nga ang kaluwasan sa mga buhi ug sa mga patay kinahanglang mahatag dinhi sa mga walog sa kabukiran. Ug ang Labawng Makagagahom nga Dios mimando nga ang Yawa dili makababag niini. Kon kana inyong masabtan, mao kana ang yawe niini. (Gikan sa usa ka diskurso sa ikaunom nga sesyon sa pagpahinungod sa Templo sa Salt Lake, Abril 1893. Typescript of Dedicatory Services, Archives, Church Historical Department, Salt Lake City, Utah.)